سندھ حکومت کے ترجمان مرتضیٰ وہاب کی پریس کانفرنس پر قائد حزب اختلاف سندھ اسمبلی حلیم عادل شیخ نے ردعمل کا اظہار کرتے ہوئے کہا کہ مرتضیٰ وہاب اترے ہوئے چہرے سے بھیگی بلی بن کر تنقید کرنے آئے تھے۔

حلیم عادل شیخ کا کہنا تھا کہ وزیر اعظم عمران خان نے آج سندھ کی ترقی کے لئے پیکیج کا  اعلان کیا ہے، مرتضی وہاب عوام کو بتاتے کہ 13 سالوں میں 7 ہزار آٹھ سو 80 ارب کہاں خرچ ہوئے؟

حلیم عادل شیخ نے کہا کہ یہ سندھ دشمن لوگ ہیں، عوام کو سہولیات ملتے نہیں دیکھ سکتے،شوکت خانم میموریل کینسر اسپتال سندھ کی عوام کے لئے بن رہا ہےجہاں سندھ کی عوام کا مفت علاج ہوگا۔

حلیم عدال شیخ نے کہا کہ ان کے سرکاری اسپتالوں میں تو بخار کی گولی نہیں ملتی، سندھ کے اسپتالوں میں علاج معالج کی سہولیات دستیاب نہیں ہیں۔

انہوں نے کہا کہ 11 ارب میں وفاق کے 725 ارب پر کام شروع ہوچکا ہے، کے فور گرین لائن نالوں کی صفائی کا کام کراچی میں شروع ہوچکا ہے۔

حلیم عادل شیخ کا کہناتھا کہ کورونا وباء میں بھی وفاق نے سندھ کی عوام کو ساٹھ ارب روپے دیئے، آج کا دیا گیا پیکج ان کرپٹ وزیروں مشیروں پر بجلی بن کر گرا ہے۔

حلیم عادل شیخ نے تنقید کرتے ہوئے مزید کہا کہ 13 سالوں تک پیپلزپارٹی نے عوام کے وسائل کو لوٹا ہے، مرتضیٰ وہاب اپنی حکومت کی کرپشن کی ترجمانی کریں۔

انہوں نے کہا کہ آپ لوگوں نے جعلی کارڈز پر ٹریکٹر بھی نکال کر بیچ دیئے ہیں، سندھ میں ترقیاتی بجٹ میں چالیس فیصد کرپشن ہوئی ہے۔