پاکستان مسلم لیگ (ن) کی مرکزی نائب صدر مریم نواز نے کہا ہے کہ تحریک انصاف کو سیاسی شہید نہیں بننے دیں گے۔

تفصیلات کے مطابق سابق وزیر اعظم نواز شریف کی صاحبزادی مریم نواز نے اپنے ایک بیان میں کہا کہ ان کی تین سالہ کارکردگی کا بوجھ نہیں اٹھانا ، چاہتے ہیں کہ تحریک انصاف حکومت پانچ سال پورے کرے اور یہ سیاسی شہید نہ بنیں۔

مریم نواز نے کہا کہ تحریک انصاف ٹوٹ نہیں رہی ہے بلکہ ٹوٹ چکی ہے، حکومت سے تین سال میں کچھ نہیں ہوا تو آئندہ دو سال میں بھی کچھ نہیں ہوگا۔

ن لیگ کی مرکزی نائب صدر کا کہنا تھا کہ مسلم لیگ (ن) تو نہیں ٹوٹی لیکن پنجاب میں حکومت گرانا دو منٹ کا کام ہے مگر ہم ہارس ٹریڈنگ نہیں چاہتے۔

 مریم نواز نے دعویٰ کیا کہ جہانگیر ترین کا گروپ جتنا نظر آرہا ہے اس سے کہیں زیادہ بڑا ہے، جہانگیر ترین کے ساتھ موجود بہت سے لوگ ہمارے ساتھ رابطے میں ہیں۔

ن لیگ کی مرکزی نائب صدر مریم نواز نے مزید کہا کہ حکومتی کارکردگی کے باعث اراکین اسمبلی کی بڑی تعداد کو عام انتخابات میں تحریک انصاف سے دوری اختیار کرنا پڑے گی۔