وزیر خارجہ مخدوم شاہ محمود قریشی نے کہا ہے کہ میں جنرل اسمبلی میں پاکستان کا بھرپور نقطہ نظر پیش کروں گا۔

تفصیلات کے مطابق وزیرخارجہ مخدوم شاہ محمود قریشی نے اقوام متحدہ جنرل اسمبلی کے ہنگامی اجلاس میں شرکت کے لئے روانگی سے قبل میڈیا سے گفتگو کرتے ہوئے کہا کہ امید ہے کہ آج کا جنرل اسمبلی کا اجلاس اہم ہوگا۔

وزیرخارجہ نے کہا کہ میری اطلاعات کے مطابق آج کے فسلطین کے موضوع پر ہونے والے اجلاس کے لئے 95 کے قریب ممالک اور آرگنائزیشن اپنے خیالات کا اظہار کریں گے۔

شاہ محمود قریشی نے یہ بھی کہا کہ خیال تھا کہ آج کا اجلاس تین گھنٹے کا ہوگا مگر یہ اجلاس طویل ہوگا، اجلاس نیویارک کے وقت کے مطابق دس بجے شروع ہوگا اور رات تک چلے گا۔

وزیرخارجہ کا کہنا تھا کہ ابھی کچھ دیر بعد پاکستانی وقت کے مطابق رات آٹھ بجے میرا جنرل اسمبلی میں خطاب ہے۔ میرا فرض بنتا ہے کہ میں حقائق جنرل اسمبلی کے سامنے رکھوں، میں جنرل اسمبلی میں پاکستان کا بھرپور نقطہ نظر پیش کروں گا۔

 شاہ محمود قریشی کا یہ بھی کہنا تھا کہ فلسطین کے وزیرخارجہ نے بتایا کہ کل رات غزہ میں پچیس منٹ میں ایک سو پچیس، بم غزہ پر گرائے گئے ، اس سے آپ فلسطین میں ہونے والے مظالم کا اندازہ لگاسکتے ہیں۔

وزیرخارجہ نے کہا کہ اس وقت جو نسل کشی ہورہی ہے،دنیا اس طرف توجہ کیوں نہیں دے رہی۔ او آئی سی کے تمام اہم ممالک متحرک ہیں، سعودی وزیرخارجہ کا شکر گزار ہوں کہ وہ خود آئے ہیں۔

 شاہ محمود قریشی نے یہ بھی کہا کہ عمران خان کا جو وژن تھا کہ امہ کو متحد کیا جائے ہم اس میں کامیاب ہوگئے ہیں، کل رات ہماری عشائیے پر نشست ہوئی، پندرہ میں سے چودہ ممبران ایک نقطے پر متفق ہیں۔

وزیرخارجہ مخدوم شاہ محمود قریشی نے مزید کہا کہ ہم توقع رکھتے ہیں کہ پندرہ کے پندرہ ممبران ایک ہی نقطے پر متفق ہوں تاکہ ایک متفقہ لائحہ عمل طے پا سکے۔