برطانوی وزیراعظم بورس جانسن نے انکوائری کمیشن میں اسلام مخالف بیان پر معافی مانگ لی ہے۔

غیر ملکی خبر رساں ادارے کے مطابق برطانوی وزیر اعظم بورس جانسن نے اسلام، برقع اور حجاب سے متعلق اپنے بیان پر پارٹی کی انکوائری کمیٹی  کے سامنے باضابطہ طور پر معافی مانگ لی ہے۔

برطانیہ میں حکمراں جماعت کنزرویٹو پارٹی کی اسلام فوبیا، اقلیتوں اور نسلی امتیاز سے متعلق انکوائری رپورٹ جاری کر دی گئی ہے اس رپورٹ کے لئے وزیراعظم بورس جانسن کا بھی انٹرویو لیا گیا تھا۔

بورس جانسن نے پارٹی کی انکوائری کمیٹی کے سامنے پیش ہو کر اپنے کالم میں برقع پہنیں مسلم خواتین کو ڈاکو اور لیٹر بکس کہنے سے متعلق سوال کے جواب میں باضابطہ طور پر معافی مانگی ہے۔

بورس جانسن کا کہنا تھا کہ مسلم خواتین کو وہ لباس پہننے کا پورا حق حاصل ہے جسے وہ پسند کرتی ہیں اور مجھے اس بات کا علم بھی ہے لیکن صحافت میں زبان زیادہ آزاد اور سنسنی خیز ہوتی ہے اس لئے یہ الفاظ استعمال ہو گئے۔

برطانوی وزیراعظم بورس جانسن نے مزید کہا کہ اب ایک ایسے عہدے پر ہوں جہاں مجھے تمام طبقات کی نمائندگی اور ان کا تحفظ کرنا ہے۔