گوگل فوٹوز کی مقبولیت سے کون واقف نہیں؟ گوگل کے اس فیچر میں  فوٹوز اور ویڈیوز کے لیے لامحدود مفت اسٹوریج موجود ہے۔

تاہم گوگل کے اعلان کے مطابق اب یہ بہترین سروس مفت اسٹوریج کی فراہمی کا سلسلہ ختم کیا جارہا ہے۔

6 ماہ پہلے گوگل نے اعلان کیا تھا کہ یکم جون 2021 سے گوگل فوٹوز کی مفت پالیسی کو تبدیل کیا جائے گا۔

گوگل کے اعلان کے مطابق فوٹوز میں اپ لوڈ ہونے والی نئی تصاویر اور ویڈیوز اس 15 جی بی مفت اسٹوریج میں شامل کی جائے گی جو ہر گوگل اکاؤنٹ کو بنانے پر صارف کو ملتی ہے۔

ابھی گوگل اکاؤنٹ کے ساتھ صارفین کو 15 جی بی آن لائن اسٹوریج دیا جاتا ہے جو جی میل، ڈرائیو وغیرہ کے لیےہوتا ہے اور اس میں ای میلز اور فائلز محفوظ ہوتی ہیں، تاہم یکم جون 2021 سے ڈاکس، شیٹس، گوگل فوٹوز پر اپ لوڈ ہونے والی تصاویر اور ویڈیوز بھی اسی 15 جی بی اسٹوریج کا حصہ ہونگی۔

گوگل کے اعلان کے مطابق یکم جون سے اپ لوڈ ہونے والی ہر نئی تصویر یا ویڈیو مفت 15 جی بی اسٹوریج میں جگہ گھیرے گی۔

نئی پالیسی سے متعلق گوگل نے بیان جاری کرتے ہوئے کہا کہ 80 فیصد صارفین کو 15 جی بی اسٹوریج کو بھرنے میں کم از کم 3 سال لگ سکتے ہیں جو کہ ایک مناسب عرصہ ہے۔