کورونا وائرس کی صورتحال کے پیشِ نظر سندھ حکومت نے سرکاری اسپتالوں میں تعینات عملے کی عید کی تعطیلات منسوخ کردی ہیں۔

تفصیلات کے مطابق صوبائی وزارتِ صحت کی سفارش پر سرکاری اسپتالوں میں تعینات عملے کی عید کی تعطیلات منسوخ کردی گئیں، عید کی چھٹیاں منسوخ کرنے کا نوٹیفکیشن بھی جاری کردیا گیا ہے۔

نوٹیفکیشن کے مطابق سرکاری اسپتالوں میں تعینات عملے کو عید کی تعطیلات کے دوران باقاعدگی اور معمول کے مطابق امور انجام دینا ہوں گے۔

نوٹیفکیشن میں کہا گیا کہ عیدکے 3 دن کے علاوہ ویکسینیشن سینٹر کھلے رہیں گے۔ سندھ حکومت نے وضاحت کی ہے کہ کوروناویکسینیشن سینٹر 13 سے 15 مئی تک بند رہیں گے۔

دوسری جانب اس سے قبل سندھ حکومت کی جانب سے کورونا وائرس کے پھیلاؤ سے بچاؤ کے لئے کورونا ایس اوپیز کے تحت 9 سے 16مئی تک نئی پابندیاں عائد کر دی گئی ہیں۔

محکمہ داخلہ سندھ کی جانب سے جاری کردہ نوٹیفکیشن کے مطابق سندھ بھر میں تمام سیاحتی تفریحی مقامات عید تعطیلات کے دوران بند رہیں گے اور شہریوں کی نقل وحرکت محدود رہے گی۔

سندھ میں لگائی گئی نئی پابندیوں کے مطابق سندھ بھر میں ریسٹورنٹ کو صرف ہوم ڈلیوری کی اجازت ہوگی جبکہ انٹر سٹی اور بین الصوبائی پبلک ٹرانسپورٹ 16مئی تک بند رہیں گی۔