پاکستان تحریک انصاف (پی ٹی آئی) کے رہنما جہانگیر ترین نے ہم خیال اراکین کے اعزاز میں لاہور کے ماڈل ٹاؤن میں واقع اپنی رہائشگاہ پر عشائیہ دیا۔

ایم پی اے سلمان نعیم نے عشائیے میں موجود شرکا سے خطاب کرتے ہوئے کہا کہ گروپ کا نام جہانگیرترین ہم خیال گروپ رکھا گیا ہے، پنجاب اسمبلی کے جمعہ کے روزاجلاس میں پاور شو کا فیصلہ کیا ہے۔

سلمان نعیم نے یہ بھی کہا کہ آج کے اجلاس میں کوئی نیا رکن اسمبلی شریک نہیں ہوا، گزشتہ اجلاس میں سےبھی کئی اراکین اسمبلی شریک نہ ہوسکے۔

ایم پی اے سلمان نعیم نے مزید کہا کہ اجلاس میں اراکین سے گروپ کےاعلان کے لئے باقاعدہ حلف لیاگیا۔ شرکت نہ کرنے والےاراکین کے ناموں کو صیغہ راز میں رکھا گیا ہے، کئی اراکین مصروفیات کی وجہ سے نہیں پہنچ سکے۔

اس موقع پر نعمان لنگڑیال نے کہا کہ جہانگیر ترین کے ساتھ اظہار یکجہتی کررہے ہیں، کل کی پیشی پر پھر اکٹھے ہو کر اظہار یکجہتی کریں گے۔

نعمان لنگڑیال نے یہ بھی کہا کہ ہماری پوری کوشش ہوگی کہ عوام دوست بجٹ ہو، سعید اکبر نوانی پنجاب اسمبلی میں اپنا نقطہ نظر بیان کریں گے۔

نعمان لنگڑیال نے مزید کہا کہ جہانگیر ترین گروپ میں 31ارکان ہیں۔ ہم ہر تاریخ پر آتے ہیں، ہماری تعداد کم نہیں ہوئی۔

عشائیہ میں شرکت کے لئے قومی و صوبائی اسمبلی کے جو اراکین اور وزرا پہنچے، ان میں ایم این اے راجہ ریاض، صوبائی وزیر نعمان لنگڑیال، صوبائی وزیر اسلم بھروانہ، صوبائی وزیر اجمل چیمہ، مشیر وزیرِاعلیٰ پنجاب فیصل حیات جبوانہ، عون چوہدری، چوہدری امین اور ایم پی اے نذیر چوہان سمیت دیگر شامل تھے۔