کورونا کی نئی اقسام کی روک تھام کیلئے پاکستان نے ایران اور افغانستان کے ساتھ سرحد بند کرنےکا فیصلہ کرلیا ہے۔

تفصیلات کے مطابق انسداد کورونا کے ادارے نیشنل کمانڈ اینڈ آپریشن سینٹر (این سی او سی) کا اجلاس ہوا جس میں کورونا وائرس کی نئی اقسام کو روکنے کیلئے افغانستان اور ایران کے ساتھ لینڈ بارڈر مینجمنٹ کا جائزہ لیا گیا۔

این سی او سی کے مطابق کورونا کی نئی اقسام کی روک تھام کیلئے ایران اور افغانستان کے ساتھ سرحد بند کرنےکا فیصلہ کیا ہے،  یہ پابندی 4 اور 5 مئی کی درمیانی شب رات ایک بجے سے 19 اور 20 مئی کی درمیانی شب تک لاگو ہوگی۔

این سی او سی کا کہنا ہے کہ پابندی کا اطلاق زمینی راستے سے آنے والے لوگوں پر ہوگا جبکہ پابندی کا اطلاق کارگو، باہمی تجارت اور پاک افغان ٹریڈ پر نہیں ہوگا، بارڈر ٹرمینل ہفتے میں 7 روز کھلے رہیں گے۔

این سی او سی کا یہ بھی کہنا ہے کہ پاکستان اور افغانستان میں موجود پاکستانیوں کو واپسی کی اجازت ہوگی ۔ افغانستان اور ایران سے طبی بنیادوں پرآنے والوں کو بھی اجازت ہوگی، اسی طرح افغانستان اور ایران کے شہریوں کو بھی واپس جانے کی اجازت ہوگئی۔

این سی او سی کے مطابق زمینی راستے سے آنے والے مسافروں کے لیے سیل ہوں گے تاہم افغانستان اور ایران جانے والوں کو واپسی کی اجازت ہو گی اور دونوں ممالک سے زمینی راستے کے ذریعے آنے والے پاکستانی مسافروں کا آر اے ٹی ٹیسٹ ہو گا۔

این سی او سی کا کہنا ہے کہ مثبت کیس آنے پر پاکستانیوں کو قریبی قرنطینہ سینٹر منتقل کیا جائے گا جبکہ مثبت آنے والے افغان شہریوں کو واپس بھیج دیا جائے گا تاہم پاکستان اور افغانستان میں موجود غیرملکی جو واپس جانا چاہتے ہیں ان کو استثنیٰ ہو گا۔

این سی او سی کا مزید کہنا ہے کہ ایران و افغان سرحد پرقانون نافذ کرنے والے ادارے کے اہلکاوں اور ہیلتھ کیئر ورکرز کی نفری بڑھانے کا فیصلہ کیا گیا ہے، عملہ ٹیسٹنگ پروٹوکول اور سخت ایس او پیز پر عملدرآمد یقینی بنائے گا۔