وزیراعلیٰ خیبر پختونخوا نے طلبہ کو رحمت اللعالمین اسکالر شپ پروگرام کے طرز پر اسکالر شپ دینے کا اصولی فیصلہ کیا ہے۔

تفصیلات کے مطابق وزیراعلیٰ خیبر پختونخوا محمود خان کی زیر صدارت محکمہ اوقاف اور مذہبی امور کا اجلاس ہوا جس میں وزیراعلیٰ خیبر پختونخوا نے طلبہ کو اسکالر شپ دینے کا فیصلہ کیا۔

اجلاس میں محکمہ اوقاف نے کمرشل جائیدادوں کے بہتر انتظام و انصرام کے لئے بزنس پلان اور اصلاحات پر پیشرفت کے بارے میں بریفنگ دیتے ہوئے کہا کہ اوقاف کی کمرشل جائیدادوں کے موجودہ کرایوں پر نظر ثانی کرکے انہیں مارکیٹ ریٹ کے برابر لایا جائے گا۔

بریفنگ میں یہ بھی کہا گیا کہ محکمہ اوقاف کی کمرشل جائیدادوں کے کرایوں کی وصولی کے نظام کو کمپیوٹرائز کیا گیا ہے جبکہ آئمہ کرام کو ماہانہ اعزازیہ دینے کے لئے انتظامات کو حتمی شکل دے دی گئی ہے۔

اجلاس کی صدارت کرتے ہوئے وزیراعلیٰ خیبر پختونخوا نے محکمہ اوقاف اور مذہبی امور کو اس سلسلے میں اسکالر اسکیم متعارف کرانے کے لئے ضروری اقدامات کی ہدایت دی جبکہ متعلقہ حکام کو اوقاف کی جائیدادوں کے بہتر انتظام و انصرام کے لئے مروجہ قوانین میں ضروری ترامیم کی بھی ہدایت دی۔

محمود خان نے کہا کہ ترامیم کو جلد حتمی شکل دے کر کابینہ کی منظوری کے لئے پیش کیا جائے اور محکمہ اوقاف کے جملہ امور کو جدید خطوط پر استوار کیا جائے۔

وزیراعلیٰ خیبر پختونخوا محمود خان نے مزید کہا کہ محکمہ کی کمرشل جائیدادوں سے متعلق تمام معاملات میں سو فیصد شفافیت کو یقینی بنایا جائے اور صوبے کے رجسٹرڈ خطیبوں کی ماہانہ تنخواہوں میں اضافے کے لئے اقدامات اٹھائے جائیں۔