عالمی بینک نے احساس ہنگامی کیش پروگرام کو دنیا کے چار سرفہرست سماجی تحفظ پروگرامز میں شامل کر لیا ہے۔

تفصیلات کے مطابق سماجی رابطے کی ویب سائٹ ٹوئٹر پر وزیراعظم عمران خان نے جاری کردہ اپنے پیغام میں بھی احساس پروگرام کی سربراہ اور ٹیم کو اس عالمی کامیابی پر مبارکباد دی ہے۔

Congratulations to Sania and the Ehsaas team for achieving this milestone and well-deserved int recognition. https://www.bolnews.com/urdu/latest/2021/05/671259/amp/

— Imran Khan (@ImranKhanPTI) May 16, 2021

ذرائع کے مطابق عالمی بینک نے کورونا وباء کے تناظر میں عالمی سماجی تحفظ پر مبنی رپورٹ “لیونگ پیپر” جاری  کی ہے۔

رپورٹ 18 مصنفین اور کئی معاونین کے اشتراک سے 650 صفحات پر مبنی جلد پر مشتمل ہے۔

رپورٹ میں عالمی وباء میں سماجی تحفظ کیلئے دنیا بھر کے ممالک کے اقدامات کی منصوبہ بندی، اطلاق اور تکمیل کو جانچا گیا ہے۔

رپورٹ کے مطابق سماجی تحفظ میں 20 مارچ 2020ء تا 14 مئی 2021ء کے دوران بہتری دیکھی گئی۔

دنیا کے 222 ممالک  میں 3 ہزار 333 سماجی تحفظ اقدامات اٹھائے گئے۔

پاکستان سماجی تحفظ کی فراہمی میں چوتھے، آبادی کے تناسب کے لحاظ سے پانچویں نمبر پر ہے۔

عالمی بینک کے مطابق اس سلسلے میں صرف منتخب ممالک نے متاثر کن چھ ہندسوں کا ہدف حاصل کیا ہے۔ پاکستان کا احساس ایمرجنسی کیش پروگرام ان میں سے ایک ہے۔

پاکستان کے احساس ایمرجنسی کیش پروگرام میں شہریوں کو ہنگامی مدد کی فراہمی کے لئے جدید ہائبرڈ طریقہ کار اپنایا گیا۔

 رپورٹ کے مطابق احساس ایمرجنسی کیش پروگرام نے 2020ء میں 1 کروڑ 50 لاکھ گھرانوں کو 12 ہزار روپے کیش دیا۔

پاکستان کی مثال دیگر ممالک کیلئے کلیدی مثال ہے، احساس ایمرجنسی کیش پروگرام نے ثابت کیا نقد رقم کی منتقلی سے سماجی و اقتصادی مسائل حل ہو سکتے ہیں۔

 رپورٹ میں کہاگیا کہ پاکستان نے دنیا بھر کو بتایا کہ بڑھتی عدم مساوات کا خاتمہ کیسے ممکن ہے۔