پاکستان مسلم لیگ ن کی ترجمان مریم اورنگزیب نے کہا ہے کہ حکومت کی جانب سے شہبازشریف کا نام بلیک لسٹ میں شامل کرنا غیرقانونی تھا، سیاسی انتقام کی بنا پر شہباز شریف کا نام بلیک لسٹ میں شامل کیا گیا۔

تفصیلات کے مطابق پاکستان مسلم لیگ ن کی ترجمان مریم اورنگزیب نے وزیراطلاعات فواد چوہدری کے بیان پر رد عمل دیتے ہوئے کہا کہ عمران صاحب نے سیاسی مخالفین کے نام بلیک لسٹ میں شامل کروائے، ‎شہباز شریف کا نام کبھی بھی ای سی ایل پر نہیں تھا۔

مریم اورنگزیب نے کہا کہ بلیک لسٹ میں دہشت گردوں اور ریاست مخالف لوگوں کے نام شامل کئے جاتے ہیں، بلیک لسٹ میں شہباز شریف کا نام عمران صاحب کے غیرقانونی حکم پر شامل ہوا تھا۔

پاکستان مسلم لیگ ن کی ترجمان نے یہ بھی کہا کہ شہباز شریف کے سفری طرز عمل کو دیکھتے ہوئے عدالت نے ایک بار سفر کی اجازت دی ہے۔

مریم اورنگزیب کا کہنا تھا کہ اربوں کی منی لانڈرنگ کے الزام کنٹینر پر ہی رہ گئے ہیں کسی عدالت میں ثابت نہیں ہوئے، فارن فنڈنگ کیس عمران صاحب کے خلاف اربوں روپے کی منی لانڈرنگ کا اوپن اینڈ شٹ کیس ہے۔

پاکستان مسلم لیگ ن کی ترجمان مریم اورنگزیب کا مزید کہنا تھا کہ عمران صاحب عوام کو ریلیف، روزگار، آٹا اور چینی دینے پر تیار نہیں، عمران صاحب اپنی سیاست اپوزیشن کو جیلوں میں قید اور بلیک لسٹ میں شامل کرکے بچانا چاہتے ہیں۔