صدر مملکت عارف علوی نے کہا ہے کہ فلسطین، جموں و کشمیر سے متعلق اقوام متحدہ کی قراردادوں پر عمل ناگزیر ہے۔

تفصیلات کے مطابق صدر مملکت عارف علوی سے اقوام متحدہ کی جنرل اسمبلی کے صدر وولکن بوزکر کی ملاقات ہوئی ہے جس میں مختلف امور پر تبادلہ خیال کیا گیا ہے۔

ملاقات میں صدر مملکت نے 21 مئی کو فلسطین کی صورتحال پر اقوام متحدہ کا اجلاس بلانے پر صدر جنرل اسمبلی کے کردار کو سراہا ہے۔

عارف علوی کا ملاقات میں کہنا تھا کہ نسلی امتیاز کی جديد صورت اسلامو فوبیا کے تدارک کے لئے بین الاقوامی تعلقات میں انصاف، اخلاقیات اور بردباری کے فروغ کی ضرورت ہے۔

صدر مملکت عارف علوی نے مزید کہا کہ ترقی پذیر ممالک پر کورونا کے معاشرتی اور معاشی اثرات کم کرنے کے لئے کورونا  ویکسین تک مساوی رسائی یقینی بنانے کی ضرورت ہے۔

اس موقع پر وولکن بوزکر نے عارف علوی کو بین الاقوامی سیاسی، سماجی و معاشی امور پر لیے گئے مختلف اقدامات سے آگاہ کیا۔

صدر مملکت نے خصوصی تقریب میں وولکن بوزکر کو ’’ ہلالِ پاکستان‘‘ کا ایوارڈ بھی دیا، ایوارڈ اقوام متحدہ کی جنرل اسمبلی کے صدر کی حیثیت سے بین الاقوامی امن، سلامتی اور پائیدار ترقی کے فروغ کے لئے ان کی شاندار خدمات کے اعتراف میں دیا گیا۔