وزیراعلیٰ سندھ مراد علی شاہ نے کہا ہے کہ سندھ حکومت صحت کی سہولیات کی فراہمی میں ایک توازن قائم رکھنے میں کامیاب رہی۔

تفصیلات کے مطابق وزیراعلیٰ سندھ نے صوبائی اسمبلی کے فلور پر 329 ارب 30 کروڑ 3 لاکھ روپے کے ترقیاتی پورٹ فولیو کے ساتھ 14 سو 77 ارب 90 کروڑ روپے کے خسارے کا بجٹ پیش کیا۔

وزیراعلیٰ سندھ نے کہا کہ سندھ میں صحت کے شعبے کے لئے بجٹ میں  29.5 فیصد اضافہ کیا گیا ہے اور اس کے لئے آئندہ مالی سال کے بجٹ میں 172.08 ارب روپے رکھے گئے ہیں۔

مراد علی شاہ نے یہ بھی کہا کہ بالخصوص وباء سے نمٹنے کے لئے 24.72 بلین روپے کے فنڈز مختص کئے گئے ہیں جبکہ رسک الاؤنس بھی شامل کیا گیا ہے۔

وزیراعلیٰ سندھ کا کہنا تھا کہ سندھ حکومت عالمی وباء سے نمٹنے کیلئے اور صحت کی دیگر سہولیات کی فراہمی میں ایک توازن قائم رکھنے میں کامیاب رہی۔

مراد علی شاہ کا یہ بھی کہنا تھا کہ کوویڈ-19 کی وباء سے جہاں ایک طرف پوری دنیا کی صحت کے نظام کو متاثر کیا ہے، وہیں سندھ میں بھی صحت کی ضروری سہولیات کی فراہمی کو یقینی بنانا ایک چیلنج بنا رہا۔

وزیراعلیٰ سندھ مراد علی شاہ کا مزید کہا تھا کہ صحت کی سہولیات کی فراہمی کو یقینی بنانے کے لئے کئی معاہدوں کی معیاد تکمیل کے قریب ہے لیکن 22-2021 میں دوبارہ تشہیر کے ذریعے صحت کی فراہمی کے ایسے مزید معاہدے کئے جائیں گے۔