گورنر پنجاب کی وزیر خارجہ سے اہم ملاقات

آمنہ رحیم

11th Jun, 2021. 10:39 am

گورنر پنجاب چوہدری محمد سرور نے اسلام آباد میں وزیر خارجہ مخدوم شاہ محمود قریشی سے  اہم ملاقات کی ہے۔

تفصیلات کے مطابق دوران ملاقات فلسطین امن سفارتی مشن اور اسلاموفوبیا کے بڑھتے ہوئے رجحان سمیت باہمی دلچسپ  امور پر تبادلہ خیال کیا ہے اور گورنر پنجاب نے مظلوم فلسطینیوں پر جاری منظم مظالم کی جانب عالمی برادری کی توجہ مبذول کروانے اور فلسطین امن سفارتی مشن کی کامیابی پر وزیر خارجہ کو مبارکباد دی ہے۔

ملاقات کے دوران دونوں رہنماؤں نے کینیڈا میں مقیم پاکستانی نژاد خاندان کے بے قصور افراد کے قتل پر گہرے دکھ اور افسوس کا اظہار کیا ہے۔

وزیر خارجہ نے ملاقات میں کہا کہ بے گناہ مقتولین کو انصاف دلانے کیلئے اور اسلاموفوبیا کے بڑھتے ہوئے رجحان کے تدارک کیلئے میری کینیڈا کے وزیر خارجہ کے ساتھ مفصل بات چیت ہوئی ہے۔

ملاقات میں وزیر خارجہ کا کہنا ہے کہ کینیڈین وزیر خارجہ نے مقتولین کو انصاف کی مکمل فراہمی کی یقین دہانی کرواتے ہوئے، اسلاموفوبیا کے بڑھتے ہوئے رجحان کے خلاف عالمی سطح پر پاکستان کے ساتھ مشترکہ کاوشیں بروئے کار لانے کا عندیہ دیا ہے۔

مخدوم شاہ محمود قریشی نے کہا کہ کینیڈین وزیراعظم جسٹن ٹروڈو کے مثبت ردعمل کا خیر مقدم کرتے ہیں، کینیڈا میں ہمارا سفارت خانہ، مقتولین کے اہل خانہ کے ساتھ مسلسل رابطے میں ہیں انہیں ہر ممکن تعاون فراہم کریں گے۔

انھوں نے کہا کہ اسلاموفوبیا اور نفرت آمیز بیانیے کی بیخ کنی کیلئے عالمی سطح پر موثر اقدامات اٹھانے کی ضرورت ہے۔

خیال رہے کہ گورنر پنجاب نے مغربی ممالک میں اسلاموفوبیا کے بڑھتے ہوئے رجحان کے تدارک کیلئے وزیر خارجہ کی جانب سے کی جانے والی موثر کاوشوں کی تعریف کی ہے۔

Adsense 300×250