صوبائِی وزیر اطلاعات سید ناصر حسین شاہ نے کہا ہے کہ مارکیٹ یا دکان والے ہمارے دشمن نہیں ہیں۔

تفصیلات کے مطابق صوبائِی وزیر اطلاعات سید ناصر حسین شاہ نے کراچی میں میڈیا سے گفتگو کرتے ہوئے کہا کہ تاجروں کو انتظامیہ کے رویے کی شکایت ہے، تاجروں کے مسائل حل کرنے کے لئے کمیٹی قائم کی گئی ہے۔

انہوں نے کہا کہ کچھ پولیس اہلکاروں کو معطل اور کچھ کے تبادلے کیے گئے ہیں۔

ناصر حسین کا کہنا تھا کہ شہریوں کو اپنا سمجھتے ہیں، کورونا سے بچاؤ کے لئے فیصلے کیے ہیں، کوئی بھی فیصلہ باہمی مشاورت سے کریں گے۔

صوبائِی وزیر اطلاعات نے یہ بھی کہا کہ دکانیں آج رات 8 بجے تک کھلیں گی، پولیس 6 بجے کے بعد دکانیں بند کرنے سے متعلق ہراساں نہیں کرے گی اور پیر سے شادی ہالز، ہوٹلز اور ریسٹورنٹس بھی کھولیں گے، نہیں چاہتے کہ کسی کا معاشی قتل ہو۔

ناصر حسین شاہ نے کہا کہ بلاول بھٹو کی باتیں غلط لی جارہی ہیں جبکہ میاں نواز شریف اور ان کی فیملی پر کیسز سیاسی انتقام ہے۔

انہوں نے یہ بھی کہا کہ لیڈر آف دی اپوزیشن کو بھی ضمانت مل گئی، بلاول بھٹو نے ایک موازنہ کیا ہے۔

صوبائِی وزیر اطلاعات کا کہنا تھا کہ خورشید شاہ ابھی کنویٹ نہیں ہیں، ابھی تک حراست میں ہیں۔

 ناصر حسین نے کہا کہ آصف علی زرداری اور فریال تالپور کے ساتھ دیکھا جائے کیسا رویہ رکھا جارہا ہے، پیپلز پارٹی کے کیسز سندھ سے ٹرانسفر کیے گئے ہیں۔

صوبائِی وزیر اطلاعات سید ناصر حسین شاہ نے مزید کہا کہ مرکز جو دعویٰ کر رہا ہے کہ ہم نے ریکارڈ قائم کرلیا ہے،  جھوٹے اعداد و شمار آپ کے سامنے ہیں، اگر یہ فگر سچے ہیں تو عام آدمی کیوں پریشان ہے۔