سندھ بھر میں آرگنائز کرائم کے خلاف آئی جی سندھ پولیس نے ڈنڈا اٹھا لیا

اسفا سروت

20th Jun, 2021. 02:54 pm

آئی جی سندھ پولیس نے کراچی، حیدرآباد، لاڑکانہ سمیت سندھ بھرمیں آرگنائز کرائم کے خلاف ڈنڈا اٹھا لیا ہے۔

تفصیلات کے مطابق سندھ بھر میں آرگنائز کرائم کی سرپرستی کرنے والے افسران کی خفیہ لسٹیں تیار کرنے کے لئے آئی جی سندھ پولیس متحرک ہے۔

پولیس ذرائع کا کہنا ہے کہ سندھ کے بڑے شہروں میں ہونے والے آرگنائز کرائم کرنے والوں کی بھی لسٹیں بنانے کے احکامات ہیں، سندھ میں پولیس افسران کے فرنٹ مینوں کے بھی نام الٹے کرنے کے لئے افسران کو خفیہ طور پر کام پر لگا دیا گیا ہے۔

پولیس ذرائع نے یہ بھی کہا کہ آئی جی سندھ کے احکامات پر حیدرآباد کے تھانوں میں آرگنائز کرائم کی تفصیلات طلب کی گئی ہیں، حیدرآباد کے مختلف تھانوں میں بڑے پیمانے پر آرگنائز کرائم کیا جارہا ہے، حیدرآباد میں سی آئی اے کے انسپکٹر منیر عباسی اور اس کے فرنٹ مین شاہ نواز، سلمان اور ساجد کالا آرگنائز کرائم کے سرپرست ہیں۔

پولیس ذرائع کی رپورٹ کے مطابق حیدرآباد کا فورٹ تھانہ آرگنائز کرائم کا مین حب بن گیا ہے۔ جوا، سٹہ، منشیات فروشی، گٹکا، ماوا سمیت دیگر آرگنائز کرائم شاہ نواز بیٹر، ساجد بیٹر اور سلمان بیٹر کی سرپرستی میں چلائے جانے کا انکشاف ہے اور سٹی، قاسم آباد، لطیف آباد، سائٹ اور بلدیہ میں بھی شاہ نواز، سلمان اور ساجد بیٹر کا سیٹ اپ ہونے کا انکشاف ہے۔

پولیس ذرائع کا کہنا یہ بھی ہے کہ پہلے مرحلے میں حیدرآباد میں موجود پولیس افسران کے فرنٹ مینوں کے خلاف کارروائی کا آغاز کیا جائے گا، کارروائی آئی جی سندھ پولیس کے احکامات پر کی جائے گی، پولیس افسران، ان کے بیٹروں اور آرگنائز کرائم کرنے والوں کے خلاف کارروائی میں پیر سے تیزی آنے کا امکان ہے۔

Adsence 300X250