وفاقی وزیر اطلاعات فواد چوہدری نے کہا کہ کشمیریوں نے ووٹ دیکر مقبوضہ کشمیر کی تحریک کو جلا بخشی ہے۔

تفصیلات کے مطابق وفاقی وزیر اطلاعات فواد چوہدری نے پریس کانفرنس کرتے ہوئے کہا کہ وزیراعظم نے تحریک انصاف کے تمام امیدواروں کو مبارکباد دی ہے۔

انہوں نے کہا کہ تحریک انصاف کو تاریخی کامیابی ملی ہے ، تاریخی کامیابی کے بعد دھاندلی کا بیانیہ تو اپنے آپ مر جاتا ہے ، لوگوں کو انتخابی عمل پر اعتماد ہے ، بلاول اور مریم کو اپنی شکست تسلیم کرنی چاہیے ، ان دونوں کو اپنے عہدوں سے استعفی دے دینا چاہیے۔

وفاقی وزیر اطلاعات نے کہا کہ مریم نواز کے بیانیے کی وجہ سے ن لیگ کو بری شکست کا سامنا کرنا پڑا ، مریم نواز کے بیانیے کو کشمیری عوام نے مسترد کر دیا ہے ، ن لیگ کی لیڈر شپ مسلسل اداروں اور فوج کو تنقید کا نشانہ بنا رہی تھی ، کشمیر کی سیاست پاکستان کی سیاست ساتھ ساتھ چلتی ہے ، پیپلز پارٹی کا پاکستان کی طرح کشمیر میں کوئی حال احوال نہیں رہا۔

فواد چوہدری نے کہا کہ 2023 میں سندھ میں پیپلز پارٹی کا یہی حال ہو گا ، سندھ میں پیپلز پارٹی کی یہ آخری حکومت ہے ، کشمیر کے لوگوں نے عمران خان کی پالیسی کو سراہا ہے ، عمران خان کشمیر کے مسئلے کو انسانی مسئلہ سمجھتے ہیں۔

انہوں نے کہا کہ کشمیریوں کے ساتھ علاقائی نہیں دلوں سے تعلق ہے ، ہمارا موقف واضح ہے، ہم بھارت سے تعلقات بہتر کرنا چاہتے ہیں ، تعلقات کی بحالی کی پہلی شرط پانچ اگست کے اقدامات کی واپسی ہے ، ہماری خارجہ پالیسی کشمیر کے اردگرد ہے۔

وفاقی وزیر اطلاعات فواد چوہدری نے کہا کہ انہی قربانیوں کے تسلسل میں عمران خان کو کشمیر کا سفیر کہتے ہیں ، پانچ اگست کو وزیراعظم کشمیر جائیں گے اور سیشن سے خطاب کریں گے ، وزیراعظم عمران خان آئندہ کی حکمت عملی اور اقدامات آزادکشمیر اسمبلی کے اجلاس میں بتائیں گے۔