لاہور کا باہمت نوجوان اپنی لگن، محنت اور حوصلے سے اولمپکس میں پاکستان کی نمائندگی کر رہا ہے۔

پہلوانوں کے شہر گجرانوالہ سے تعلق رکھنے والے طلحٰہ طالب ویٹ لفٹر ہیں جو کہ اپنی مدد آپ کے تحت خود محنت کر کے ٹوکیو اولمپکس تک پہنچے ہیں۔

اس اسٹوری میں ہم آج آپ کو طلحٰہ طالب کے بارے میں بتائیں گے کہ وہ کس طرح اولپمکس تک پہنچے ہیں۔

مڈل کلاس فیملی سے تعلق رکھنے والے طلحٰہ نے آٹھ سال کی عمر سے ہی ٹریننگ شروع کر دی تھی جبکہ ٹریننگ کے کوچ بھی کوئی اور نہیں بلکہ طلحٰہ کے والد ہی تھے۔

بین الاقوامی نشریاتی ادارے کو دئیے گئے انٹرویو میں طلحٰہ کا کہنا تھا کہ میرے والد بھی ویٹ لفٹر تھے مگر بازو میں تکلیف کے باعث ویٹ لفٹنگ نہیں کر سکتے ہیں۔

طلحٰہ نے اپنے والد کے خواب کو آگے لے کر چلنے کا فیصلہ کیا تھا۔ طلحٰہ کے والد کی خواہش تھی کہ وہ پاکستان کا نام روشن کریں لیکن بازو زخمی ہو جانے کی وجہ سے وہ مقابلہ نہ کر سکے، لیکن ان کا بیٹا اس خواب کو پورا کر رہا ہے۔

طلحٰہ نے اپنے والد کے حوالے سے بات کرتے ہوئے کہاکہ میرے والد صرف ایک باپ ہی نہیں بلکہ ایک بہترین کوچ بھی ہیں، والد کا خواب میں پورا کر رہا ہوں، جس کی والد کو بے حد خوشی ہے۔

انہوں نے کہاکہ والد نے مجھے بالکل اسی طرح سکھایا ہے جیسے کہ ایک ویٹ لفٹر کو ٹرینر سکھاتا ہے۔ وہ مجھے میری غلطی پر برہمی کا اظہار بھی کرتے ہیں اور سپورٹ بھی کرتے ہیں۔

طلحٰہ کا کہنا ہے کہ میں نے بہت مشکل حالات میں ٹریننگ کی ہے، اُس وقت جب میرے پاس کچھ نہیں تھا نہ ہی ویٹ لفٹنگ کا سامان اور نہ ہی جگہ ۔

انہوں نے بتایاکہ  ٹریننگ کی سہولیات میسر نہیں ہیں جو کہ ایک ویٹ لفٹر کو درکار ہوتی ہیں، اسی لیے میں نے اپنے استاد سے درخواست کر کے اسکول ہی میں ٹریننگ شروع کی۔

جب اسکول سے چھٹی ہوتی ہے یا پھر کلاس شروع ہونے سے پہلے کسی بھی وقت میں ٹریننگ مکمل کر لیتا ہوں۔ اس دوران کافی مشکلات پیش آتی ہیں مگر میں اپنے خواب کو پورا کرنے کے لیے محنت کرتا ہوں۔

طلحٰہ نے مزید بتایاکہ اولمپکس میں جانے سے دو ماہ پہلے ایشئین چیمپئین شپ میں بہترین کارکردگی دکھائی تھی۔ اسی مقابلے میں طلحٰہ کے مد مقابل عالمی ویٹ لفٹر تھے۔

Advertisement

Pakistan is proud of Talha Talib. Urge sponsors and sports administration to help athletes like Talha, they have the potential to bring home Olympic medals and make Pakistan proud if given the facilities and financial support. #SupportAthletes #OlympicGames pic.twitter.com/Hp4TryjwPC

— Shadab Khan (@76Shadabkhan) July 25, 2021

واضح رہےکہ آئی ڈبلیو ایف جو کہ ویٹ لفٹرز کی عالمی تنظیم ہے، اس تنظیم نے طلحٰہ کی کارکردگی کو مد نظر رکھتے ہوئے ان کا نام سیلیکٹ کیا اور صلاحیتوں کااعتراف کرتے ہوئے ٹوکیو اولمپکس میں شرکت یقینی بنائی۔