آرمی چیف جنرل قمر جاوید باجوہ نے کہا ہے کہ ہم ترکی کے ساتھ برادرانہ تعلقات کی نہایت قدر کرتے ہیں۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق آرمی چیف جنرل قمر جاوید باجوہ سے کمانڈر ترکش لینڈ فورسز جنرل امیت دندار کی ملاقات ہوئی جس میں باہمی پیشہ وارانہ امور خاص کر دفاع و سیکیورٹی تعاون پر بات چیت کی گئی۔

آئی ایس پی آر کے مطابق جی ایچ کیو آمد پر ترکش جنرل کو فوجی دستے کی جانب سے گارڈ آف آنر پیش کیا گیا۔

آئی ایس پی آرکا کہنا ہے کہ دونوں جانب سے تربیت و انسداد دہشت گردی کے شعبے سمیت پاک ترک تعلقات کے فروغ پر اتفاق کیا گیا۔

آئی ایس پی آرکا یہ بھی کہنا ہے کہ ملاقات میں ترکش جنرل نے خطے کے امن و استحکام کے لیے پاک فوج کے کردار کی تعریف کی۔

اس موقع پر آرمی چیف جنرل قمر جاوید باجوہ نے کہا کہ ہم ترکی کے ساتھ تاریخی، ثقافتی، مذہبی بنیادوں پر استوار برادرانہ تعلقات کی نہایت قدر کرتے ہیں۔