اکثر ذہنی الجھنوں کے شکار افراد اپنی روزمرہ کی روٹین سے  پریشان ہو جاتے ہیں ،افسردگی اور بے چینی بھی بڑھنے لگتی ہے، ان تمام مسائل کا حل براہ راست متاثرہ شخص سے جڑا ہوتا ہے ،زندگی اور صحت کو بہتر بنانے کے لئے خود ہی اس کا علاج کیا جا سکتا ہے۔

طبی ماہرین کے مطابق زندگی کے آدھے مسائل انسان خود اپنے لئے پیدا کرتا ہے، آسان چیزوں کو چھوڑ کر مشکل چیزوں کا انتخاب اور کسی بھی تکلیف دہ چیز کو بھولنے کے بجائے تا دیر اُسے سوچتے رہنے یا اُس کا حل تلاش نہ کرنے کے سبب زندگی کا زیادہ تر حصہ مشکلوں اور پریشانیوں میں گزر جاتا ہے اور ہم اس کے عادی ہو کر اپنی روٹین متاثر کر بیٹھتے ہیں۔

ذہنی و طبی ماہرین کی جانب سے تجویز کیا جاتا ہے کہ ہر نئی صبح پیش آنے والا مسئلہ اُسی دن حل کر لینا چاہئیے ، اس سے نہ صرف زندگی خوشگوار ہوگی بلکہ آسان ہونے کے ساتھ ساتھ آپ سے جڑے رشتوں کے لئے بھی بہتر اور مثبت ہو جائے گی۔

ماہرین کے مطابق گھر سے باہر پیشہ ورانہ اور گھریلو زندگی میں توازن برقرار رکھنا بے حد ضروری ہے، اکثر افراد پیشہ ورانہ مشکلات کے سبب پریشانیوں اور الجھنوں کو گھر لے آتے ہیں جن کا اثر گھریلو زندگی سمیت ساتھ رہنے والے خاندان پر بھی پڑتا ہے اور اس چڑچڑے پن اور غصے کا شکار گھر والے بھی ہونے لگتے ہیں۔

گھر والوں کی زندگی مشکل بنائے بغیر باہر کے معاملات باہر ہی نمٹا کر آ ئیں اور گھر میں اپنے خاندان کے لئے ایک عام فرد کی طرح رویہ اختیار کریں، گھر والوں کے ساتھ باہر جانے، گھومنے، ساتھ میں کھیلنے کا وقت نکالیں اور خود کو ذہنی دباؤ سے آزاد کرنے کے لئے مثبت رویہ اپنائیں۔

ڈپریشن میں مبتلا افراد اکثر یہ محسوس کرتے ہیں کہ اُن کی اداسی کی کوئی خاص وجہ نہیں ہے مگر ایسا نہیں ہوتا، ارد گرد کا ماحول ڈپریشن کی بڑی وجہ قرار دی جاتی ہے یا خود اپنے لئے پیدا کیے گئے حالات، اندر ہی اندر کوئی چیز آپ کی ذہنی صحت کو متاثر کر رہی ہوتی ہے، لہٰذا خود کے بارے میں سوچیں، خود کے لئے وقت نکالیں، اداس بیٹھنے یا کسی سے الجھنے کے بجائے اپنا فارغ وقت ورزش کر کے گزاریں۔

اچھے رویئے اور خوشگوار موڈ میں رہنے کا ایک طریقہ یہ ہے کہ خود کو قدرتی ماحول سے قریب رکھیں، آفس میں ہیں تو اپنے ارد گرد پودے لگائیں، صبح کا آغاز باغ میں چہل قدمی سے کریں، گھر میں پودے لگائیں اور انہیں اپنے ہاتھ سے صاف کریں اور پانی دیں، اُن کے بڑھنے اور پھلنے پھولنے پر نظر رکھیں ، یہ عمل آپ کو خوشی دے گا۔

اس کے علاوہ باتیں، مشکلات اور الجھنیں بتانے سے آدھے مسائل وہیں حل ہو جاتے ہیں  الجھنوں اور پریشانیوں کو اپنے دل میں زیادہ دیر جگہ دینے کے بجائے کسی نہ کسی کے ساتھ ضرور شیئر کریں ، ایک قریبی دوست ضرور بنائیں جس سے ہر مسئلہ اور پریشانی پر بات کی جا سکے اور مسئلے کا حل نکالا جا سکے۔