صدر مملکت ڈاکٹر عارف علوی نے کہا کہ ملک کی ترقی کراچی کی ترقی سے منسلک ہے۔

تفصیلات کے مطابق صدر مملکت ڈاکٹر عارف علوی کی زیر صدارت گورنر ہاؤس میں اعلیٰ سطحیٰ پر اجلاس ہوا جس میں کورونا وائرس کی نئی لہر اور بڑھتے ہوئے کیسز پر بحث ہوئی اور کراچی ٹرانسفارمیشن منصوبہ اور  شہر کے بنیادی ڈھانچے کی تعمیر و ترقی کے حوالے سے بھی تبادلہ خیال ہوا۔

ذرائع کے مطابق اجلاس میں گورنر سندھ عمران اسماعیل ، وفاقی وزیر منصوبہ بندی و ترقیات اسد عمر اور رکن قومی اسمبلی آفتاب صدیقی نے شرکت کی۔

ڈاکٹر عارف علوی نے کہا کہ ہم لوگوں کی پریشانیوں کو نظرانداز نہیں کرسکتے، وفاق کراچی کے معاملات کو حل کرنے میں اپنا بھر پور کردار ادا کر رہا ہے۔

واضح رہے کہ گورنرسندھ عمران اسماعیل نے شہر میں پینے کے صاف پانی کی فراہمی ، سیوریج ، کچرے کا نظام اور ٹرانسپورٹ کی صورتحال اور اس سلسلے میں وفاقی حکومت کے اٹھائے گئے اقدامات سے متعلق صدر مملکت ڈاکٹر عارف علوی کو آگاہ کیا۔

 صدر مملکت ڈاکٹر عارف علوی نے مزید کہا کہ عوام جلد سے جلد ویکسین لگوائیں، وائرس کے پھیلاؤ کی روک تھام کے لئے این سی او سی کی ہدایات پر عوام ہر صورت عمل کریں، مؤثر فیصلہ سازی سے پاکستان کو دوسرے ممالک کی نسبت صورتحال سے بچنے میں بہت مدد ملی ہے۔