صدر مملکت ڈاکٹر عارف علوی نے کہا ہے کہ پاکستان سعودی عرب کے ساتھ تعلقات کو خصوصی اہمیت دیتا ہے۔

 تفصیلات کے مطابق صدر مملکت ڈاکٹر عارف علوی سے سعودی وزیر خارجہ  فیصل بن فرحان السعود کی ملاقات ہوئی ہے۔

صدر مملکت نے ملاقات میں بھارتی مقبوضہ جموں و کشمیر میں معصوم مسلمانوں پر بھارتی ظلم و ستم پر روشنی ڈالی۔

صدر مملکت نے کہا کہ پاکستان برادر ملک کے ساتھ معاشی اور تجارتی تعلقات بڑھانے کا خواہاں ہے، سعودی قیادت کا وژن 2030ء، سرسبز سعودی عرب اور سرسبز مشرق وسطیٰ منصوبے لائقِ تحسین ہیں۔

ڈاکٹر عارف علوی نے یہ بھی کہا کہ کورونا کے دوران پاکستانی کمیونٹی کا خیال رکھنے پر سعودی قیادت کے شکر گزار ہیں، عالمی وباء کے دوران حج کے کامیاب انتظامات پر سعودی حکومت مبارکباد کی مستحق ہے۔

صدر مملکت کا کہنا تھا کہ سعودی وزیر خارجہ خادمین حرمین شریفین، شاہ سلمان بن عبدالعزیز اور شہزادہ  محمد بن سلمان تک میری نیک تمنائیں پہنچائیں۔

ڈاکٹر عارف علوی کا یہ بھی کہنا تھا کہ بین الاقوامی برادری کشمیر میں بھارتی انسانی حقوق کی خلاف ورزیاں رکوائے، اقوام متحدہ کی قراردادوں کے مطابق کشمیریوں کو خود ارادیت دے۔

صدر مملکت ڈاکٹر عارف علوی کا مزید کہنا تھا کہ امید ہے کہ سعودی وزیر خارجہ کے دورے سے دو طرفہ تعلقات مزید مضبوط ہو ں گے۔

ملاقات میں سعودی وزیر خارجہ نے کہا کہ دونوں ممالک کے مابین حقیقی طور پر برادرانہ تعلقات ہیں اور سعودی عرب دو طرفہ تعاون کی موجودہ سطح کو برقرار رکھنے کا خواہاں ہے۔

سعودی وزیر خارجہ نے مزید کہا کہ سعودی قیادت پاکستان کے ساتھ تعلقات کو خصوصی اہمیت دیتی ہے، دونوں برادر ممالک کے مابین اقتصادی تعلقات مزید فروغ دینے کی ضرورت ہے۔