ترجمان سندھ حکومت بیرسٹر مرتضیٰ وہاب نے کہا ہے کہ عید الاضحیٰ ہمیں قربانی کا درس دیتی ہے۔

تفصیلات کے مطابق ترجمان سندھ حکومت بیرسٹر مرتضیٰ وہاب نے عید الاضحیٰ پر اپنے ایک پیغام میں تمام پاکستانی قوم اور عالم اسلام کوعید کی مبارکباد پیش کی ہے۔

بیرسٹر مرتضیٰ وہاب نے کہا کہ عید قربان پر ہمیں مستحقین اور غرباء کو یاد رکھنا ہے، سنت ابراہیمی کی ادائیگی میں کورونا سے بچاؤ کی تمام ایس او پیز پر عملدرآمد کرنا ہے۔

سندھ حکومت کے ترجمان کا کہنا تھا کہ ہمیں عید قرباں پر بھی بہت احتیاط سے کام لینا ہے اور سماجی فاصلے سمیت تمام احتیاطی تدابیر پر عمل کرنا ہیں کیونکہ یہ کسی انفرادی شخص کے لئے نہیں بلکہ اس میں پورے معاشرے کی بھلائی ہے۔

بیرسٹر مرتضیٰ وہاب کا یہ بھی کہنا تھا کہ سندھ حکومت کا ساتھ دینے پر اپنے عوام کے شکر گزار ہیں، اللہ تعالی ہمیں اس خطرناک وباء پر قابو پانے کی مزید ہمت عطا کرے۔

 سندھ حکومت کے ترجمان بیرسٹر مرتضیٰ وہاب کا مزید کہنا تھا کہ ہمیں احتیاط کا دامن کسی صورت نہیں چھوڑنا جبکہ عید کی تعطیلات میں رش والے علاقوں میں جانے سے گریز کریں اور زیادہ وقت اپنے گھروں پر اپنے پیاروں کے ہمراہ گزاریں۔