گورنر سندھ عمران اسماعیل نے کہا ہے کہ قربانی کا جذبہ ایک عالمگیر حیثیت کا حامل ہے۔

تفصیلات کے مطابق عید الاضحیٰ کے موقع پر گورنر سندھ عمران اسماعیل نے اپنے پیغام میں کہا کہ پوری امت مسلمہ اور قوم کو میری طرف سے عید الاضحیٰ کی بہت بہت مبارک ہو، اللہ تعالیٰ ہم سب کو عیدالاضحی کی حقیقی خوشیوں سے ہمکنار کرے۔

عمران اسماعیل نے کہا کہ قربانی جیسی عبادت کو اس کی روح کے مطابق سمجھ کرعمل کرنے کی توفیق عطا فرمائے۔

گورنر سندھ نے یہ بھی کہا کہ قربانی کا جذبہ ایک عالمگیر حیثیت کا حامل ہے، کوئی بھی قوم ایثار وقربانی کے جذبے کے بغیرترقی نہیں کرسکتی۔

عمران اسماعیل کا کہنا تھا کہ سنت ابراہیمی کا تقاضا ہے کہ ہم زندگی کے ہرشعبے میں ایثار وقربانی کا مظاہرہ کریں اور عید کی خوشیوں میں معاشی طور پرپیچھے رہ جانے والوں کا خاص خیال رکھیں۔

گورنر سندھ کا یہ بھی کہنا تھا کہ کورونا کی وباء ساری انسانیت کے لیے ایک چیلنج بن کر آئی ہے، کورونا کے باعث ساری دنیا اس وقت انتہائی نازک صورتحال سے گزر رہی ہے۔

عمران اسماعیل نے کہا کہ عید قربان پر تمام احتیاطی تدابیر اختیار کی جائیں، عید الاضحی کے ایام میں سماجی فاصلہ ،ماسک اور دیگر احتیاطی تدابیر ضرور اختیار کریں۔

گورنر سندھ نے یہ بھی کہا کہ ایس او پیز پر عمل سے ہم اپنے پیاروں کو اس موذی وباء سے محفوظ رکھ سکتے ہیں، عید الاضحیٰ قربانی و ایثار کا نام ہے، اللہ تعالی ہم سب کی قربانیاں قبول فرمائے۔

عمران اسماعیل کا کہنا تھا کہ کشمیری اپنےحق خودارادیت کے لئے بے پناہ قربانیاں دے رہے ہیں، عید الاضحیٰ کے موقع پر اپنے کشمیر ی بھائیوں کو بھی یاد رکھیں۔

 گورنر سندھ عمران اسماعیل کا مزید کہنا تھا کہ پاکستانی قوم اپنے کشمیری بہن بھائیوں کے ساتھ کھڑی ہے اور ہمیشہ ان کی سیاسی، سفارتی اور اخلاقی امداد کرتی رہے گی۔