عید الاضحیٰ کے دِنوں میں مختلف انفیکشنز اور بیماریاں پھیلنے کے خطرات میں کس حد تک اضافہ ہو جاتا ہے، نیز کورونائی ایّام میں کس قِسم کی احتیاطی تدابیر اپنانے کی ضرورت ہے؟

اس سوال کے جواب میں ماہرِ امراضِ ناک، کان ،حلق اور پاکستان میڈیکل ایسوسی ایشن کے سیکرٹری جنرل، ڈاکٹر سیّد محمّد قیصر سجّاد کا کہنا تھا کہ سب سے پہلے تو عوام کو یہ سمجھنے کی ضرورت ہے کہ Infectious Diseases متعدّی امراض یا چُھوت کی بیماریاں کیا ہوتی ہیں۔

ایسی ہر بیماری، جو چھینکنے، کھانسنے، ہاتھ لگانے سے بآسانی منتقل ہوجائے وہ متعدّی مرض کہلاتی ہیں ،جیسے، کورونا وائرس، عام نزلہ، زکام، کھانسی یا چکن پاکس وغیرہ۔

عید الاضحی کے دِنوں میں بیماریاں پھیلنے کی وجہ لوگوں کی غفلت، کاہلی اور بے حِسی ہے جس سے شہر میں کس قدر بیماریاں جنم لے رہی ہیں۔

اس کے علاوہ ہماری عوام مہنگا جانور خریدتے وقت تو کوئی کمپرو مائز نہیں کرتی لیکن گلیوں، محلّوں کی صفائی کرواتے ہوئے جیبیں کھنگالنے لگتے ہیں۔

اللّہ کی راہ میں قربانی کے لئے لائے جانے والے جانوروں کو جس سج دھج سے پالتے اور اپنے گھروں میں رکھتے ہیں، قربانی کا گوبر کئی کئی روز تک سڑکوں پر پڑا رہتا ہے، جو صرف گندگی وغلاظت کا نہیں بلکہ ہزاروں اور لاکھوں بیماریوں کا بھی موجب بنتا ہے۔