مودی سرکار نے مقبوضہ جموں و کشمیر میں بربریت کا بازار گرم کررکھا ہے، عثمان بزدار

اسفا سروت

05th Aug, 2021. 09:18 am
عثمان بزدار

وزیراعلیٰ پنجاب سردار عثمان بزدار نے کہا کہ مودی سرکار نے مقبوضہ جموں و کشمیر میں بربریت کا بازار گرم کررکھا ہے۔

تفصیلات کے مطابق وزیراعلیٰ پنجاب سردار عثمان بزدار نے یوم استحصال کشمیر پر پیغام دیتے ہوئے کہا کہ مودی نے 5 اگست 2019 کو اقوام متحدہ کے ضابطوں کی دھجیاں اڑائیں، بھارت نے غیر قانونی طورپر مقبوضہ جموں و کشمیر کی حیثیت تبدیل کر کے انسانی حقوق کو پامال کیا۔

 انہوں نے کہا کہ بھارت کی ہٹ دھرمی اورغیر قانونی اقدام کو ہر سطح پر پہلے بھی بے نقاب کیا ہے اورآئندہ بھی کرتے رہیں گے، بھارت میں اقلیتوں پر عرصہ حیات تنگ کردیا گیا ہے، 22 کروڑ پاکستانی کشمیریوں کے ساتھ کھڑے ہیں اورکھڑے رہیں گے۔

وزیراعلیٰ پنجاب نے کہا کہ بھارت کے زیر تسلط غیر قانونی مقبوضہ جموں و کشمیر کے لاک ڈاؤن کو 2 سال مکمل ہوگئے مگر کشمیریوں کے دکھ کم نہ ہوئے، کشمیریوں پر انسانیت سوز مظالم پر بے حسی عالمی برادری کے خلاف چارج شیٹ ہے، مشکل ترین حالات میں بھی کشمیریوں کا عزم اور حوصلہ برقرار ہے۔

عثمان بزدار نے کہا کہ کشمیر کا بحران عالمی برادری کی بے حسی کا نوحہ ہے، غیر قانونی بھارتی مقبوضہ جموں و کشمیر کی عوام کی لازوال جدوجہد کو سلام پیش کرتے ہیں، کشمیری عوام ہمارے دلوں میں بستے ہیں، کشمیر پاکستان کی شہ رگ ہے اور پاکستان کشمیر کے بغیر نامکمل ہے، ہم کشمیر کاز سے ایک انچ بھی پیچھے نہیں ہٹ سکتے۔

وزیراعلیٰ پنجاب سردار عثمان بزدار نے مزید کہا کہ کشمیری عوام کی سفارتی، سیاسی اوراخلاقی حمایت جاری رکھیں گے، انشااللہ کامیابی کشمیری عوام کا مقدر بنے گی، بھارت کو ہر ظلم کا حساب دینا ہوگا، بے گناہ شہید کشمیریوں کا خون رنگ لائے گا اور آزادی کشمیر کی صبح ضرور طلوع ہوگی۔

Square Adsence 300X250

مزید پڑھیں