کسانوں کے مفادات کے لیے ہر اقدامات اٹھائیں گے، اسد قیصر

وریشہ مسعودویب ایڈیٹر

04th Aug, 2021. 09:49 pm
اسد قیصر

اسپیکر قومی اسمبلی اسد قیصر نے کہا ہے کہ کسانوں کے مفادات کے لیے ہر اقدامات اٹھائیں گے۔

تفصیلات کے مطابق اسپیکر قومی اسمبلی اسد قیصر سے وفاقی وزیر خزانہ شوکت ترین نے ملاقات کی جس میں قبائلی اضلاع سے متعلق اہم امور پر گفتگو ہوئی۔

ملاقات میں ملکی معاشی صورت حال پر تبادلہ خیال کیا گیا جبکہ کسانوں کو درپیش مسائل پر بھی بات چیت کی گئی۔

وفاقی وزیر خزانہ نے کہا کہ سابقہ فاٹا کے تمام اضلاع کی ترقی اور وہاں کے عوام کی محرومیاں ختم کرنا اولین ترجیح ہے، قبائلی اضلاع میں معاشی سرگرمیاں شروع ہونے  سے روزگار ملے گا۔

شوکت ترین نے یہ بھی کہا کہ کامیاب جوان پروگرام سے قبائلی نوجوانوں کو روزگار دینگے، سابقہ فاٹا کے ترقیاتی پیکج منتخب قبائلی قیادت  اور عوام کی مشاورت سے آگے بڑھایا جائے گا۔

وفاقی وزیر خزانہ شوکت ترین نے مزید کہا کہ کامیاب جوان پروگرام کے ذریعے قبائلی اضلاع کے نوجوانوں کو قرضہ دینگے تاکہ وہ اپنا روزگار شروع کرسکیں اور معاشی اعتبار سے اپنے پاؤ ں پر کھڑا ہوسکیں۔

ملاقات میں اسپیکر قومی اسمبلی اسد قیصر نے حکومت کے قبائلی عوام اور غریبوں کو اپنے پاؤں پر کھڑا کرنے کے اقدامات کو سراہا۔

اسپیکر قومی اسمبلی نے کہا کہ نئے اضلاع میں صحت انصاف کارڈ کا اجراء قبائلی عوام کے لیے حکومت کا بہت بڑا تحفہ ہے۔

 اسد قیصر نے یہ بھی کہا کہ تمباکو کے کاشتکاروں سے تمباکو کی خریداری میں رکاوٹوں کو دور کرنے کی ہدایت کرتے ہوئے کہا کہ فصلوں کو بروقت خریداری نہ ہونے کی وجہ سے کسانوں کی مشکلات میں اضافہ ہوتا ہے۔

اسپیکر قومی اسمبلی اسد قیصر نے مزید کہا کہ کسی صورت کسانوں کا استحصال برداشت نہیں کرسکتا، کسانوں کے مفادات کے لیے ہر اقدامات اٹھائیں گے۔

Adsence 300X250

مزید پڑھیں