جنگ کو ہوا دینا یا جنگ کا طول پکڑنا پورے خطے کے مفاد میں نہیں ، زاہد خان

مریم اقبال

03rd Aug, 2021. 02:40 pm

عوامی نیشنل پارٹی کے ترجمان زاہد خان نے کہا کہ جنگ کو ہوا دینا یا جنگ کا طول پکڑنا پورے خطے کے مفاد میں نہیں۔

تفصیلات کے مطابق عوامی نیشنل پارٹی کے ترجمان زاہد خان نے کہا کہ افغانستان میں جاری جنگ کے خاتمے کیلئے فریقین کے درمیان مذاکرات ہی واحد حل ہے۔

انہوں نے کہا کہ پاکستان میں جنگی خبروں کو یہاں پر بڑھا چڑھا کر پیش کرنے سے اپنا ہی نقصان ہوگا ، اس بار بھی اگر ایک منتخب حکومت کوگرانے کی سازش کی گئی تو تباہی پہلے سے زیادہ ہوگی ، افغانستان میں امن ہوگا تو پاکستانی بھی پرامن زندگی گزارنے کے قابل ہوں گے، ہمیں یہ حقیقت سمجھنی ہوگی۔

زاہد خان نے کہا کہ وہاں پر ہر مکتبہ فکر ایک ساتھ ہیں اور افغان حکومت کی حمایت کررہے ہیں، پاکستان کو اپنی پالیسی واضح کرنی ہوگی ، دہشتگردی ایک ناسور ہے، خیبرپختونخوا سمیت مختلف علاقوں میں دہشتگردی کے بڑھتے ہوئے واقعات تشویشناک ہیں۔

عوامی نیشنل پارٹی کے ترجمان زاہد خان نے کہا کہ یہ واقعات بتارہے ہیں کہ دہشتگرد ایک بار پھر منظم ہورہے ہیں، اس بار راستہ نہ روکا گیا تو تباہی پہلے سے کئی گنا زیادہ ہوگی ، سلیکٹڈ وزیراعظم، انکے وزراء اور مشیروں کی جانب سے طالبان کی حمایت کرنا انکی اصل ذہنیت کی عکاسی کررہی ہے ، پی ٹی آئی کی اصلیت یہ ہے کہ ایک دہشتگرد کو کشمیر میں رکن قانون ساز اسمبلی بنایا جارہا ہے۔

Adsence 300X250