پی ٹی آئی ایم پی اے ڈاکٹر سیماء ضیاء کے گھر کے باہر ڈکیتی کی واردات ہونے پر پی ٹی آئی کراچی کے صدر خرم شیر زمان نے شدید الفاظ میں مزمت کی ہے۔

خرم شیر زمان کہتے ہیں کہ کراچی میں جگہ جگہ پولیس کے ناکوں کے باوجود جرائم میں اضافہ قابل مذمت ہے۔

اپنے جاری کردہ بیان میں انہوں نے بتایا کہ ڈاکٹر سیما ضیاء کے گھر کے باہر ڈکیتوں نے پہلے فوڈ پانڈا رائیڈر کے ساتھ لوٹ مار کی اور اسکے بعد ڈکیتی کی مزاحمت کے دوران ملزمان نے فائرنگ کردی تھی۔

ان کا کہنا تھا کہ فائرنگ کی زد میں ایم پی اے ڈاکٹر سیماء ضیاء کا چوکیدار آیا، چوکیدار زخمی حالت میں ہسپتال میں زیر علاج ہے۔

خرم شیر زمان نے کہا کہ پولیس سڑکوں پر خانہ پوری اور اپنی جیبیں گرم کررہی ہے،  ڈاکٹر سیما ضیاء کے گھر کے قریب ڈی آئی جی ساؤتھ کی رہائش گاہ ہے اور ڈی آئی جی ساؤتھ کے علاقے میں جرائم کی واردارتیں لمحہ فکریہ ہے۔

ان کا کہنا تھا کہ شہر کا امن و امان برقرار رکھنا آئی جی سندھ کے بس میں نہیں ہے، آئی جی سندھ نے کراچی کو ڈکیتوں کے سپرد کردیا ہے۔

واضح رہے کہ انہوں نے یہ بھی بتایا کہ وزیر اعظم صوبہ سندھ میں امن و امان کی صورتحال کا نوٹس لیں اور وفاق آئینی اقدام کے ذریعے کراچی کے عوام کو تحفظ فراہم کرے۔