وزیراعظم عمران خان نے کہا ہے کہ افغان تنازعے کا بہترین حل سیاسی ہے۔

تفصیلات کے مطابق وزیراعظم عمران خان سے نیدرلینڈ کے وزیراعظم کا ٹیلیفونک رابطہ ہوا جس میں دونوں رہنماؤں نے افغانستان کی صورتحال پر تبادلہ خیال کیا جبکہ دونوں رہنماؤں نے مختلف شعبوں میں باہمی تعاون بڑھانے پر  بھی اتفاق کیا۔

ٹیلیفونک رابطے کے دوران وزیراعظم عمران خان نے کہا کہ پاکستان افغانستان میں بدلتی صورتحال کو دیکھ رہا ہے،پاکستان خطے اور عالمی شراکت داروں سے رابطے میں ہے۔

 وزیراعظم کا کہنا تھا کہ افغان تنازعے کا بہترین حل سیاسی ہے، پر امن اور مستحکم افغانستان پاکستان اور خطے کے لیے ضروری ہے۔

عمران خان کا یہ بھی کہنا تھا کہ پاکستان سفارتکاروں، عالمی اداروں کے نمائندگان کی واپسی کے لیے معاونت فراہم کررہا ہے۔

وزیراعظم عمران خان  کا مزید کہنا تھا کہ افغان شہریوں کی سیکیورٹی اور ان کے حقوق کا تحفظ اہم ہے، عالمی برادری کا افغانستان کی اقتصادی صورتحال میں بہتری اور ان کی تعمیر نو کے لیے کردار ادا کرنا چاہیے۔

اس موقع پر نیدرلینڈ کے وزیراعظم نے سفارتکاروں کی واپسی کے لیے اقدامات پر وزیراعظم عمران خان کا شکریہ ادا کیا۔