ترجمان سندھ حکومت و ایڈمنسٹریٹر کراچی مرتضیٰ وہاب  نے کہا ہے کہ  صحافیوں سے اپیل کرتا ہوں کہ ویکسین لگوائیں۔

تفصیلات کے مطابق ترجمان سندھ حکومت و ایڈمنسٹریٹر کراچی مرتضٰی وہاب نے کراچی پریس کلب میں ویسکیسن سینٹر کا افتتاح کردیا ہے۔

ان کا کہنا تھا کہ صحافیوں کی سہولت کے لیے پریس کلب میں سینٹر بنایا گیا ہے، صحافی برادری کے ساتھ ہر ممکن تعاون جاری رکھیں گے۔

ایڈمنسٹریٹر کراچی کا کہنا تھا کہ شہر کی بہتری کے لیے سب کو ملکر کام کرنا ہوگا، کوشش ہے عوام کو زیادہ سے زیادہ ریلیف فراہم کیا جائے۔

اس موقع پر سیکرٹری کراچی پریس کلب محمد رضوان بھٹی کا کہنا تھا کہ کورونا سے بچاؤ کے لیے سب کو ملکر کام کرنا ہوگا، صحافی اور انکے اہل خانہ کراچی پریس کلب سے ویکسین کرواسکیں گے۔

محمد رضوان کا کہنا تھا کہ ویکسینیشن سینٹر کے قیام پر سندھ حکومت کے شکر گزار ہیں۔

اس موقع پر صدر کراچی پریس کلب محمد فاضل جمیلی، سیکرٹری محمد رضوان بھٹی اور مجلس عاملہ سمیت دیگر صحافی بھی موجود تھے۔