عمران خان نے بھارت کی انسانیت سوز کارروائیوں سے پردہ اٹھایا ہے، محمود خان

اسفا سروت

05th Aug, 2021. 01:37 pm

وزیر اعلیٰ خیبر پختونخوا محمود خان نے کہا کہ وزیراعظم عمران خان نے بھارت کی انسانیت سوز کارروائیوں سے پردہ اٹھایا ہے۔

تفصیلات کے مطابق وزیراعلیٰ خیبر پختونخوا محمود خان نے یوم استحصال کشمیر کے موقع پر اپنے بیان میں کہا کہ کشمیری عوام گزشتہ 7 دہائیوں سے بھارت کی ریاستی دہشتگردی کا شکار ہیں۔

انہوں نے کہا کہ فاشسٹ بھارت نے کشمیری عوام کو حق خود ارادیت سے محروم رکھنے کیلئے ظلم و ستم کی انتہا کردی ہے، بھارتی حکومت نے 2 سال قبل مقبوضہ کشمیر کی خصوصی حیثیت کا خاتمہ کیا، بھارت نے کشمیریوں پر ظلم و ستم کی نئی داستان کا آغاز کیا، کشمیری عوام کو بد ترین ریاستی دہشتگردی اور سخت ترین لاک ڈاﺅن کا سامنا کرنا پڑ رہا ہے۔

وزیر اعلیٰ خیبر پختونخوا نے کہا کہ کشمیری عوام  کے حق خودارادیت کی اخلاقی ، سیاسی اور سفارتی سطح پر حمایت جاری رکھنے کے عزم کا اعادہ کرتے ہیں، نہتے کشمیری عوام بھارتی ظلم کے سامنے سینہ سپر ہیں، کمشمیری عوام کے حوصلے پہاڑوں سے بھی بلند ہیں۔

محمود خان نے کہا کہ ہم بین الاقوامی طاقتوں، اقوام متحدہ اور انسانی حقوق کی علمبردار تنظیموں سے مقبوضہ کشمیر میں انسانی حقوق کی پامالیوں کا نوٹس لینے کا پرزور مطالبہ کرتے ہیں، وزیراعظم عمران خان نے بین الاقوامی فورمز پر کشمیر کا مقدمہ جس انداز میں اٹھایا اس کی ماضی میں مثال نہیں ملتی۔

وزیر اعلیٰ خیبر پختونخوا محمود خان نے مزید کہا کہ وزیراعظم عمران خان نے کشمیر کی نازک صورتحال کو اجاگر کیا ہے، کشمیری مسلمان جس بہادری اور جرات سے بھارتی غاصبانہ قبضے کے خلاف برسر پیکار ہیں ہم انہیں خراج تحسین پیش کرتے ہیں۔

Square Adsence 300X250

مزید پڑھیں