جماعت اسلامی پاکستان کی سینئر رہنما عائشہ سید نے کہا ہے کہ آج بھی مسئلہ کشمیر پر ہمارا مضبوط مؤقف ہے۔

تفصیلات کے مطابق راولپنڈی میں یوم تاسیس کے موقع  پرعائشہ سید کا کہنا تھا کہ پاکستان جماعت اسلامی قیام پاکستان سے لے کر اب تک ملک میں اسلامی نظام کے لیے مصروف عمل ہے، جماعت اسلامی ایک فکری اور انقلابی جماعت ہی نہیں بلکہ ایک نظریاتی تحریک بھی ہے۔

 عائشہ سید  کا کہنا تھا کہ جماعت اسلامی گذشتہ 80 سال سے پرامن اور جمہوری جدوجہد کے ذریعے افراد اور معاشرے کی تعمیر کا کام کر رہی ہے،جماعت اسلامی ایک عالمگیر اسلامی تحریک ہے، جماعت اسلامی پاکستان میں اسلام کو مکمل ضابطہ حیات کے طور نافذ کرنے کا عزم رکھتی ہے۔

ان کا کہنا تھا کہ  زندگی کے ہر گوشے میں قرآن و سنت کی تعلیمات کا نفاذ جماعت اسلامی کی اولین ترجیح رہا ہے ۔

عائشہ سید کا کہنا تھا کہ  ملک کی سیاسی جماعتیں اپنی سیاست کو مضبوط کرنے میں مصروف ہیں، دینی جماعتیں اپنے عقائد اور نظریات پر کام کر رہی ہیں۔

یوم تاسیس کے موقع پر ان کا کہنا تھاکہ جماعت اسلامی قرآن و سنت کی تعلیمات پھیلانے میں مصروف ہے،جماعت اسلامی نے روز اول ہی سے “سب کا بے لاگ احتساب”کا نعرہ لگایا ہے۔

اس موقع پر عائشہ سید کا کہنا تھا کہ  جماعت اسلامی نے عوام کی دہلیز پر بروقت انصاف کی فراہمی کے لیے عملی جدوجہد کی ہے،کرپشن کے خاتمے کے لیے عوام میں شعور بیدار کرنے میں جماعت اسلامی اپنا کردار ادا کیا ہے، ہمارے مخالفین بھی اس ضمن میں ہماری پر امن جدوجہد کے معترف ہیں۔

ان کا کہنا تھا کہ جماعت اسلامی ملک کی سب سے بڑی دینی اور جمہوری جماعت ہے، جماعت اسلامی میں ہر شخص کو اظہار رائے کی آزادی ہے-

عائشہ سید کاکہنا تھا کہ  جماعت اسلامی کے امیر سراج الحق بھی احتساب سے بالا تر نہیں، پچھلے 80 سالوں میں ہمارے افراد پر کرپشن ،کمیشن اور اقربا پروری کا کوئی داغ نہیں ہے۔

جماعت اسلامی کی سینئر رہنما کا کہنا تھا کہ جماعت اسلامی کے اراکین اسمبلی کی کارکردگی ہمیشہ 100 فیصد رہی ہے، جماعت اسلامی نے ہمیشہ عوام کی خدمت کو مقدم رکھا ہے،جماعت اسلامی کے شعبہ الخدمت کے کارکنان کسی صلے کی تمنا کیے بغیر خلق خدا کی خدمت کر رہے ہیں ۔

عائشہ سید کا کہنا تھا کہ  جماعت اسلامی کا اصل مقصد ملک میں شریعت کا نفاذ ہے، جس کے لیے ہمارے بزرگوں نے بے انتہا قربانیاں دیں، نظریہ پاکستان کی تکمیل تبھی ممکن ہے جب پاکستان میں مدینہ کی طرز پر اسلامی حکومت قائم ہو۔

جماعت اسلامی پاکستان کی سینئر رہنما عائشہ سید کا مزید کہنا تھا کہ  جماعت اسلامی عالمی اسلامی تحریکوں کی مدد ،تعاون اور حمائت کا عزم رکھتی ہے، ہم دنیابھر میں مظلوم مسلمانوں کی جدو جہد آزادی کو قدر کی نگاہ سے دیکھتے ہیں ۔