وفاقی اردو یونیورسٹی میں عہدوں کی جنگ کے باعث جامعہ میں انتظامی بحران پیدا ہوگیا ہے۔

تفصیلات کے مطابق مستقل وائس چانسلر تعیناتی کے باوجود ڈپٹی چیئرسینیٹ نے قائم مقام وائس چانسلر کا عہدہ سنبھال لیا ہے۔

ذرائع کا کہنا ہے کہ وفاقی وزارت تعلیم نے گزشتہ روز ایسوسی ایٹ پروفیسر ڈاکٹر شاہد قریشی کی بطور مستقل وائس چانسلر تعیناتی کا نوٹیفکیشن جاری کیا تھا ، گزشتہ روز ڈپٹی چیئر سینیٹ کو قائم مقام وائس چانسلر تعینات کرانے کے لیے اجلاس ایمرجنسی کمیٹی بھی طلب کیا گیا تھا۔

ذرائع نے بتایا کہ اب ایک ہی وقت میں وفاقی اردو یونیورسٹی کے دو اسسٹنٹ پروفیسرز قائم مقام رجسٹرار کے دعویدار ہیں، اسسٹنٹ پروفیسر ڈاکٹر محمد صارم نے مدت پوری کر کے جانے والی قائم مقام وائس چانسلر ڈاکٹر روبینہ مشتاق کا فیصلہ ماننے سے انکار کردیا ہے جبکہ گزشتہ شب مدت پوری کر کے جانے والی قائم قائم وائس چانسلر ڈاکٹر روبینہ مشتاق نے اسسٹنٹ پروفیسر ڈاکٹر صارم کی جگہ اسسٹنٹ پروفیسر محمد صدیق کی رجسٹرار تعیناتی کا نوٹیفکیشن جاری کیا تھا۔

نئے تعینات قائم مقام رجسٹرار اسسٹنٹ پروفیسر محمد صدیقی نے ڈاکٹر صارم کو خط لکھا ہے اور کہا ہے کہ یہ عمل کارسرکار میں مداخلت کے زمرے میں آتا ہے ، اگر چارج نہ چھوڑا تو مجھے قانون نافذ کرنے والے اداروں کو اطلاع کرنا پڑے گا۔

واضح رہے کہ اسسٹنٹ پروفیسر ڈاکٹر محمد صارم نے رجسٹرار کا عہدہ چھوڑنے کے بجائے دفتر کو تالے لگا دیا ہے۔