نیوزی لینڈ کی کرکٹ ٹیم 18 سال بعد کل جمعہ کی شب پاکستان پہنچے گی جس کے لیے پاکستان کرکٹ بورڈ (پی سی بی) نے تیاریاں شروع کر دی ہیں۔

تفصیلات کے مطابق نیوزی لینڈ کی کرکٹ ٹیم 10 اور 11 ستمبر کی درمیانی شب پاکستان پہنچ رہی ہے جس کے لیے سیکیورٹی سمیت ہر طرح کے انتظامات بہترین انداز میں کیئے جا رہے ہیں، پاکستان کرکٹ ٹیم بھی اسلام آباد پہنچ چکی  ہے۔

ذرائع کا کہنا ہے کہ قومی اسکواڈ میں شامل تمام کھلاڑیوں کی کوویڈ ٹیسٹنگ کی گئی، ایک روز کورنٹائن میں رہنے اور کوویڈ ٹیسٹ منفی آنے پر کھلاڑیوں کو آج سے پنڈی کرکٹ اسٹیڈیم میں ٹریننگ کی اجازت دی جائے گی۔

پاکستان اور نیوزی لینڈ کے درمیان تین ایک روزہ میچوں پر مشتمل سیریز پنڈی کرکٹ اسٹیڈیم میں ہوگی جس کے میچز 17، 19 اور 21 ستمبر کو کھیلے جائیں گے، میچز کیلئے 25 فیصد شائقین کرکٹ کو بھی اسٹیڈیم میں آنے کی اجازت دی گئی ہے۔

راولپنڈی اسٹیڈیم اور قذافی اسٹیڈیم میں 25 فیصد تماشائیوں کو این سی او سی کی ہدایت کے مطابق اجازت حاصل ہے اور ابھی اس سے متعلق کوئی تازہ ہدایت جاری نہیں کی گئی ہیں۔

راولپنڈی اسٹیڈیم میں 4 ہزار 500 اور قذافی اسٹیڈیم میں 5 ہزار 500 تماشائیوں کو اجازت حاصل ہے۔

این سی او سی کی ہدایات کو مدِ نظر رکھتے ہوئے ٹکٹس کے لیے پالیسی کے اعلان کا امکان اگلے ایک دو روز میں متوقع ہے، مکمل ویکسینیشن شدہ شائقین کرکٹ میچ دیکھ سکیں گے۔

دوسری جانب قومی ٹیم کے مایہ ناز کھلاڑی شاداب خان نے کہا ہے کہ ورلڈکپ قریب ہے منفی چیزوں پر توجہ نہیں دیں گے۔

میڈیا سے گفتگو کرتے ہوئےشاداب خان نے کہا کہ ملاقات میں رمیز راجہ اپنے منصوبے سے متعلق آگاہ کرنا چاہتے تھے۔

قومی کرکٹر نے کہا کہ رمیز راجہ چاہتے ہیں کھلاڑی ماڈرن کرکٹ کھیلیں جبکہ سلیکشن کے حوالے سے چیف سلیکٹر نے وضاحت کر دی ہے۔

 انہوں نے کہاکہ مصباح الحق اور وقار یونس کا جانا ان کا ذاتی معاملہ ہے۔