مسلم لیگ (ن) کے صدر اور قائد حزب اختلاف شہباز شریف مقامی ہوٹل سے کراچی ایئرپورٹ کے لئے روانہ ہوگئے ہیں۔

تفصیلات کے مطابق شہباز شریف اب سے کچھ دیر بعد کراچی سے  لاہور کے لیے روانہ ہونگے، کراچی جناح انٹرنیشنل ایئرپورٹ پر خاتون شہری نے شہباز شریف سے مکالمہ کیا۔

مسلم لیگ (ن) کے صدر اور قائد حزب اختلاف شہباز شریف نے کہا  کہ موجودہ حکومت نے لاہور کا برا حشر کر دیا ہے، لاہور میں کچرا دیکھ دیکھ کر دل خراب ہوتا ہے۔

شہباز شریف کا کہنا تھا کہ پتہ ہی نہیں چلتا کہ وزیر اعلیٰ پنجاب سردار عثمان بزدار کہاں ہے، ہم لاہور سمیت پورے پاکستان میں آپ کو دیکھنا چاہتے ہیں۔

دوسری جانب مسلم لیگ (ن) کے صدر اور قائد حزب اختلاف شہباز شریف نے اخترمینگل کی رہائش گاہ پر اپنے بیان میں کہا کہ تمام صوبوں کا احترام کرنا ہوگا، مسائل کے حل کیلئے صوبوں کوان کے وسائل فراہم کرنے ہوں گے، جمہوری نظام کے فروغ کیلئے سب کو مل کر کام کرنا ہوگا۔

شہباز شریف کا کہنا تھا کہ جمہوری نظام کے فروغ کیلئے سب کو مل کر کام کرنا ہوگا، آرٹیکل 58 ٹوبی نے کئی جمہوری حکومتوں کا بستر گول کیا تھا، 58 ٹوبی کی شق ختم کرنے کیلئےعطااللہ مینگل کا اہم کردارتھا، عطااللہ مینگل کی خدمات کو ہمیشہ یاد رکھا جائے گا۔

مسلم لیگ (ن) کے صدر اور قائد حزب اختلاف شہباز شریف کا مزید کہنا تھا کہ عطااللہ مینگل کی جمہوریت اور آئین کی پاسداری کیلئے بہت خدمات ہیں، قائداعظم کے خواب کی تعبیرکرنی ہے تو سب کو ساتھ لے کر چلنا ہوگا۔