مسلم لیگ ن کی ترجمان عظمیٰ بخاری نے کہا ہے کہ اس حکومت کا ہمیشہ کی طرح آج ایک اور لطیفہ سامنے آیا ہے۔
تفصیلات کے مطابق مسلم لیگ ن کی ترجمان عظمیٰ بخاری نے ویڈیو پیغام میں کہا ہے کہ آج کا لطیفہ یہ ہے کہ میاں نواز شریف کو لاہور کے کوٹ خواجہ سعید اسپتال میں ویکسین لگادی گئی ہے۔
مسلم لیگ ن کی ترجمان عظمیٰ بخاری نے کہا کہ مزے کی بات یہ ہے کہ این سی او سی کے ریکارڈ میں اس کو اپ لوڈ بھی کردیا ہے ، اس سے بڑی ناکامی اور نا اہلی اور کیا ہوسکتی ہے ، جہاں میاں صاحب کا شناختی کارڈ پہلے ہی بلاک ہے اس پر انٹری کیسے ہوگئی۔
اس سے قبل مسلم لیگ(ن) پنجاب کی ترجمان عظمیٰ بخاری نے کہا تھا کہ عثمان بزدار عمران خان کی طرح بلین ٹری پروگرام کی جعلی تصویریں شیئر کرنے لگ گئے ہیں۔
انہوں نے کہا تھا کہ بزدار صاحب اتنی دو نمبری اچھی نہیں ہوتی،میں شاہدرہ کی ووٹر ہوں،آپ کا شاہدرہ کسی اور سیارے میں ہے،جہاں یہ سب ہورہا ہے ، عمران خان نے جیسے درخت کے پی کے میں لگائے ایسے درخت عثمان بزدار شاہدرہ میں لگارہے ہیں ، شاہدرہ میں گندگی،کچرے،سیوریج کے پانی سے لوگوں کا جینا محال ہوچکا ہے۔
مسلم لیگ(ن) پنجاب کی ترجمان عظمیٰ بخاری نے کہا تھا کہ عثمان بزدار جعلی تصویریں شیئر کرکے شاہدرہ کو لاہور کی جنت بناکر پیش کررہے ہیں ، سرسبز شاداب پنجاب مہم کے دوران حکومت کے لگائے 57فیصد پودے پانی نہ ملنے اور دیکھ بھال نہ ہونے سے مر چکے ہیں۔
عظمیٰ بخاری نے کہا تھا کہ کاش عثمان بزدار اصلی مرے ، مرجھائے اور گلے سڑے پودوں کی تصویریں شیئر کرتے ، جعلی طریقے سے بنی حکومت کے کام بھی جعلی اور فوٹوسیشن پر مبنی ہوتے ہیں۔
انہوں نے کہا تھا کہ قوم ایک کروڑ نوکریاں اور پچاس لاکھ گھر مانگ رہی ہے ، عمران خان اور عثمان بزدار قوم کا پیٹ درختوں کے پتوں سے بھرنے کی کوشش کررہے ہیں۔
مسلم لیگ(ن) پنجاب کی ترجمان عظمیٰ بخاری نے کہا تھا کہ عمران صاحب قوم نے درختوں کے پتے نہیں روٹی کھاکر پیٹ بھرنا ہے لیکن آپ لوگ قوم کے منہ سے بچے ہوئے نوالے بھی چھیننے میں لگے ہیں۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News