وزیر مملکت فرخ حبیب نے کہا کہ مریم نواز کا نام ای سی ایل میں نہ ہوتا تو وہ آج پاکستان میں نہ ہوتیں۔

تفصیلات کے مطابق وزیر مملکت فرخ حبیب نے مریم صفدر کی پریس کانفرنس پر ردعمل دیتے ہوئے کہا کہ نواز شریف اور مریم کو ہونے والی سزاؤں کے خلاف اپیلوں کی سماعت ہوئی ، آج پھر انہوں نے وکیل کو تبدیل کیا، جولائی 2018سے اپیلیں زیر سماعت ہیں۔

انہوں نے کہا کہ یہاں پر ان کو کہنا چاہیے کہ اپیلوں کی سماعت روزانہ کی بنیاد پر ہو ، ایک درجن سے زائد بار التواء لے چکے ہیں،  اپنی پٹیشن پر دلائل دینے کے بجائے وکیل بیمار یا کبھی کورونا ہوجاتا ہے ، عدالت نے بھی کہہ دیا کہ تاخیری حربے استعمال ہورہے ہیں۔

وزیر مملکت فرخ حبیب نے کہا کہ جس کے خلاف فیصلہ آئے تو اپیل میں جاکے کہتا ہے کہ فوری فیصلہ کروایا جائے، یہاں کام مختلف ہے ، انہیں پتہ ہے کہ انہیں سزائیں چوری اور کرپشن پر ہوئی ہیں،عدالت کو مطمئن کرنے کے لیے کچھ نہیں ہے ، نواز شریف سے کرپشن پر ریکوری ہونے جارہی ہے ، ان کی جائیدادیں نیلام ہونے جارہی ہیں ،اس پر ان کے پیٹ میں درد ہے۔

فرخ حبیب نے کہا کہ یہ لوگ پاکستان کے تشخص اور سالمیت کا بھی خیال نہیں کرتے، اپنے ذاتی مفادات کو ترجیح دیتے ہیں ، بھارت کو بے نقاب کرنے پر مریم صفدر کے ٹوئٹر سے کوئی ٹویٹ نہیں آیا ، آج انہیں الیکشن کمیشن کی یاد آرہی ہے، چھ ماہ پہلے مریم نے الیکشن کمیشن کے باہر کھڑے ہو کر دھمکیاں دی تھیں۔

انہوں نے کہا کہ سپریم کورٹ پر حملے، فون پر ججز کو فیصلے لکھوانے والے یہ ہی لوگ ہیں ، یہ وہ لوگ ہیں جو اقتدار ہو تو پاکستان کے اندر اور اقتدار نہ ہو تو باہر ہوتے ہیں، مریم نواز کا نام ای سی ایل میں نہ ہوتا تو وہ آج پاکستان میں نہ ہوتیں ، اداروں کی تضیحک ان کا وطیرہ ہے ، آپ جو اداروں کا احترام کرتے ہیں وہ بھی ہمارے سامنے ہے۔

وزیر مملکت فرخ حبیب نے کہا کہ جہاں جمہوریت ہوتی ہے وہاں احتساب اور اختیار پر کڑا احتساب بھی ہوتا ہے ، ایسا نہیں ہوسکتا کہ یہ کہیں کہ اقتدار میں آؤ لوٹ مار کروں،مال بناؤ اور کوئی پوچھے تو انتقامی کارروائی کا کہو۔