سابق وزیر داخلہ احسن اقبال نے کہا ہے کہ دیہاتی علاقوں میں بجلی کے بل دیئے جارہے ہیں۔

تفصیلات کے مطابق قومی اسمبلی میں امجد خان نیازی کی زیرِ صدارت اجلاس ہوا ہے، جس میں سابق وزیر داخلہ احسن اقبال نے اظہارِ خیال کرتے ہوئے کہا کہ دیہاتی علاقوں میں بجلی کے بل بھیجے جارہے ہیں، حکومت فوری طور پر نوٹس لے۔

دوسری جانب مسلم لیگ ن کے صدر شہباز شریف نے قومی اسمبلی میں اظہار خیال کرتے ہوئے کہا کہ وفاقی وزیر نے جو الفاظ استعمال کیے قابل مذمت ہیں ، شیریں مزاری  ہمارے لیے قابل احترام ہیں ، جو زبان استعمال کی گئی وہ قابل مذمت ہے۔

انہوں نے کہا کہ بیمار ماں اور بیٹی کی دوائی کہاں سے آتی ہے ، ملک کی معیشت کا بھٹہ بیٹھ چکا ہے ، وزیر خزانہ نے کہا تھا ہم کوئی نیا ٹیکس نہیں لگائیں گے ، بجلی، پیٹرول کی قیمت کہاں تک جا پہنچی ، ان کی بد ترین گورننس پر آج آسمان بھی رو رہا ہے ، پاکستان میں اتنی مہنگائی ہے کہ آسمان بھی رو رہا ہے۔

شہباز شریف نے کہا کہ اپنے گریبان میں جھانکیں ، لوڈ شیڈنگ کس کے دور میں ختم ہوئی ، اتفاق فاؤنڈری کی مشینیں بیچ کر قرضہ اتارا ، ایک روپیہ بھی معاف نہیں کروایا ، نوازشریف کو سزا پانامہ میں نہیں اقامہ پر ہوئی تھی، بات بہت دور تک نکل جائے گی اگر ہم نے بات کی تو ، کسی دن یہاں اچھے طریقے سے بحث کرلیتے ہیں۔

مسلم لیگ ن کے صدر شہباز شریف کا کہنا تھا کہ ریکارڈ کو درست کرنا چاہتا ہوں کہ سزا پانامہ پر نہیں اقامہ پر ہوئی تھی ، میں بات کروں گا تو بات بہت دور تلک جائے گی۔