سابق وزیراعظم نواز شریف کو کورونا ویکسین لگنے کے معاملے پربالآخر نادرا نے ایکشن لے لیا ہے۔

تفصیلات کے مطابق نادرا نے نواز شریف کے شناختی کارڈ پر ویکسین سرٹیفکیٹ جاری کرنا بلاک کر دیا ہے۔

ذرائع کے مطابق نادرا کی ویب سائٹ پر شناختی کارڈ کی تاریخ اجرا درست نہیں کا پیغام چلا دیا گیا ہے۔

  نواز شریف کے شناختی کارڈ نمبر پر الیکشن کمیشن سے ڈیٹا آ رہا ہے لیکن نادرا نے وقتی طور پر بلاک کر دیا ہے۔

ذرائع کے مطابق محکمہ صحت اور نادرا حکام اپنی نااہلی کو چھپانے کی کوشش کر رہے ہیں۔

 ایف آئی اے نے اس معاملے کی تحقیقات شروع کر دیں ہیں۔

ذرائع کے مطابق وزیراعلیٰ پنجاب سردار عثمان بزدار نے سیکرٹری صحت سے رپورٹ طلب اور واقعے کی جامع تحقیقات کا حکم دے دیا ہے۔

وزیراعلیٰ پنجاب سردار عثمان بزدار نے حکم دیا ہےکہ کورونا ویکسین کے غلط اندراج کے حوالے سے ہر پہلو سے انکوائری کرکے 48 گھنٹے میں رپورٹ پیش کی جائے۔

دوسری جانب  وزیرداخلہ شیخ رشیداحمد کو بھی لند ن میں موجود سابق وزیراعظم  نواز شریف کو کورونا ویکسین لگنے کے حوالے سے بریف کر دیا گیا ہے۔

وزیرداخلہ شیخ رشیداحمد نے نواز شریف کے معاملے پر نوٹس لے لیا ہے اور مکمل تحقیقاتی رپورٹ جلد پیش کرنے کی بھی ہدایت کی ہے۔

واضح رہےکہ لندن میں موجود سابق وزیراعظم نواز شریف کو لا ہور میں کورونا  ویکسین لگادی گئی ہے۔

 سابق وزیراعظم اور مسلم لیگ ن کے قائد نواز شریف کے شناختی کارڈ پر گزشتہ روز ویکسی نیشن کا اندراج کیا گیا۔ ویکسی نیشن کا جعلی اندراج نادرا کے ویب پورٹل پر بھی اپ لوڈ ہے۔

ریکارڈ کے مطابق  نواز شریف کو چینی ویکسین سائنو ویک لگائی گئی۔ انہیں ویکسین کی دوسری خوراک ابھی لگنا باقی ہے۔

دوسری جانب اسلام آباد میں میڈیا سے گفتگو کرتے ہوئے مر یم نواز نے کہاکہ سابق وزیراعظم نواز شریف کی کورونا ویکسین کے جعلی سرٹیفکیٹ کی خبرمضحکہ خیزاورباعث تشویش ہے۔

 مسلم لیگ ن پنجاب کی ترجمان عظمیٰ بخاری نے سابق وزیراعظم نواز شریف کو کورونا ویکسی نیشن لگانے پر رد عمل دیتے ہوئے کہاکہ اس حکومت کا ہمیشہ کی طرح آج ایک اور لطیفہ سامنے آیا ہے، میاں نواز شریف کو لاہور کے کوٹ خواجہ سعید ہسپتال میں ویکسین لگا دی گئی ہے۔

 عظمیٰ بخاری نے کہاکہ جس کا ریکارڈ موجود ہے اور این سی او سی کے پاس اندراج بھی کر دیا گیا یے، اس سے بڑی ناکامی اور نااہلی اس حکومت کی کیا ہو سکتی ہے، سوال یہ ہے کہ میاں صاحب کا آئی ڈی کارڈ بلاک ہے تو انٹری کیسے ہو گئی۔

یاد رہےکہ لندن بیٹھے ن لیگ کے قائد نواز شریف کو لاہور میں کورونا ویکسین لگی ہے، این سی او سی کے ریکارڈ میں نواز شریف کو 22 ستمبر کو ویکسین لگائی گئی۔