رینجرز اور پولیس کی جانب سے شہر قائد کے علاقے اورنگی ٹاؤن اور قصبہ کالونی میں مشترکہ کارروائی کی گئی ہے۔

تفصیلات کے مطابق رینجرز اور پولیس نے انٹیلی جنس معلومات کی بنیاد پر مشترکہ کارروائی کرتے ہوئے کراچی کے علاقے اورنگی ٹاؤن قصبہ کالونی سے انتہائی مطلوب ڈکیت ملزم عامر محمد کو گرفتار کرلیا ہے۔

ترجمان رینجرزکاکہنا ہے کہ ملزم نے 30 جولائی 2021 کو اپنے ساتھیوں ارسلان، زاہد اور شیر خان کے ہمراہ کورنگی میں واقع بینک سے رقم لے کر نکلنے والے شہری کو لوٹا تھا ، ملزمان شہری کا تعاقب کرتے ہوئے اسلحے کے زور پر اس سے ایک لاکھ چار ہزار روپے نقدی رقم اور موبائل فون چھین کر فرار ہو گئے تھے۔

ترجمان رینجرز کا مزید کہنا تھا کہ واقعے  کی اطلاع ملتے ہی پولیس نے ملزمان کا پیچھا کیا جس پر ملزمان نے پولیس پر فائرنگ کر دی اور پولیس کی جوابی فائرنگ میں ملزم کے دو ساتھی ارسلان اور زاہد زخمی حالت میں پولیس نے گرفتار کرلیے جبکہ ملزم عامر محمد فرار ہونے میں کامیاب ہو گیا تھا۔

        انہوں نے بتایا کہ دوران تفتیش ملزم نے 2021 میں اپنے ساتھیوں راحیل عرف مالو، ریحان، شیر خان، ظاہر اور ارسلان کے ساتھ مل کر ڈکیتی کی متعدد وارداتوں میں ملوث ہونے کا اعتراف کیا ہے۔

واضح رہے کہ ملزم کے دیگر ساتھیوں کی گرفتاری کے لیے چھاپے مارے جارہے ہیں جبکہ گرفتار ملزم کو مزیدقانونی کارروائی کے لیے پولیس کے حوالے کردیا گیا ہے۔

خیال رہے کہ رینجرز کی جانب سے عوام سے یہ  اپیل کی گئی ہے کہ ایسے عناصر کے بارے میں اطلاع فوری طور پرقریبی رینجرز چیک پوسٹ، رینجرز ہیلپ لائن 1101 یا رینجرز مددگار واٹس ایپ نمبر03479001111 پر کال یا ایس ایم ایس کے ذریعے دیں۔