بہترین کرکٹ ٹیم اور بہترین کرکٹ معیشت دو بڑے چیلنجز ہیں ،چیئرمین پی سی بی

زاہد فاروق ملک رپورٹر

07th Oct, 2021. 11:45 pm

پاکستان کرکٹ بورڈ(پی سی بی) کے چیئرمین رمیز راجہ نے کہا ہے کہ بہترین کرکٹ ٹیم اور بہترین کرکٹ معیشت دو بڑے چیلنجز ہیں۔

تفصیلات کے مطابق پاکستان کرکٹ بورڈ کے چیئرمین رمیز راجہ نے اس بات کا اعادہ کیا ہے کہ ایک ترقی پذیر کرکٹ معیشت ملک میں وقت کی ضرورت ہے۔

 رمیز راجہ نے کہا کہ ایک سرمایہ کار نے مجھے آفر کی ہے کہ اگر پاکستان آئندہ ٹی ٹوئنٹی  ورلڈ کپ میں بھارت کو ہرا دیتا ہے تو پی سی بی کے لیے بلینک چیک تیار ہے۔

ان کا کہنا تھا کہ  اگر ہمیں مضبوط مالی مدد حاصل ہوجائے تو دنیا کی کوئی ٹیم پاکستان کے دورے سے انکار نہیں کرے گی۔

 رمیز راجہ کا کہنا تھا کہ اگر ہماری کرکٹ کی معیشت مضبوط ہو جائے تو انگلینڈ یا نیوزی لینڈ سمیت کوئی اور ہمارا استعمال نہیں کرسکے گا ۔

رمیز راجہ نے ڈومیسٹک کرکٹرز کے لیے بہتر تنخواہوں کے بارے میں بھی بات کی۔

  چیئرمین پی سی بی کا مزید کہنا تھاکہ ہم نے ڈومیسٹک کرکٹرز کی تنخواہوں میں لاکھوں روپے کا اضافہ کیا ہے کیونکہ ہم اس بات کو یقینی بنانا چاہتے ہیں کہ وہ ہر سال کم از کم 40 لاکھ روپے کمائیں، پی سی بی اس سلسلے میں ا سپانسرز کی بھی تلاش کر رہا ہے۔

Square Adsence 300X250