دہشت گردوں کے مذموم عزائم ناکام بنانے کے لئے سیکیورٹی فورسز پرعزم ہیں، وزیر مملکت

Tanzeela qureshi

18th Oct, 2021. 06:39 pm
فرخ حبیب

وزیر مملکت اطلاعات و نشریات فرخ حبیب نے کہا ہے کہ دہشت گردوں کے مذموم عزائم ناکام بنانے کے لئے پولیس اور سیکیورٹی فورسز پرعزم ہیں۔

تفصیلات کے مطابق وزیر مملکت اطلاعات و نشریات فرخ حبیب نے سریاب روڈ کوئٹہ دھماکے کی شدید مذمت کرتے ہوئے کہا کہ کوئٹہ دھماکے میں شہید ہونے والے پولیس اہلکار کی مغفرت اور زخمیوں کی جلد صحت یابی کیلئے دعا گو ہیں۔

فرخ حبیب کا کہنا تھا کہ دہشت گردوں کے مذموم عزائم ناکام بنانے کے لئے پولیس اور سیکیورٹی فورسز پرعزم ہیں، بچے کچھے دہشت گردوں کو کیفر کردار تک پہنچانے کے لئے سکیورٹی فورسز کسی قربانی سے دریغ نہیں کر رہیں۔

 واضح رہے کہ بلوچستان یونیورسٹی کے گیٹ کے قریب دھماکہ ہوا ہے، اسسٹنٹ کمشنر کوئٹہ کا کہنا ہے کہ دھماکے میں 13 پولیس اہلکار زخمی ایک شہید ہوا، دھماکے میں 3 سویلین بھی زخمی ہوئے ہیں۔

اے سی کوئٹہ کا کہنا ہے کہ دھماکے میں مجموعی طور ایک شہید 16 افراد زخمی ہوئے ہیں۔

دوسری جانب وزیر اعلیٰ پنجاب سردار عثمان بزدار نے کوئٹہ میں سریاب روڈ پر دھماکہ کی شدید مذمت کرتے ہوئے کہا کہ جامِ شہادت نوش کرنے والے پولیس اہلکار کی قربانی کو خراجِ عقیدت پیش کرتے ہیں۔

وزیر اعلیٰ پنجاب نے دھماکے میں زخمی ہونے والے پولیس اہلکاروں اور دیگر افراد کی جلد صحت یابی کیلئے دعا کی۔

وزیر اعلیٰ پنجاب سردار عثمان بزدار نے کہا کہ مٹھی بھر دہشت گرد قوم کے پختہ عزم کو کمزور نہیں کرسکتے، قوم دہشت گردی کے ناسور کے مکمل خاتمے کے لئے یکجان ہے۔

Square Adsence 300X250