نااہل اپوزیشن کا پروپیگنڈہ گھٹیا سیاست کی بقاء کیلئے ہے، ڈاکٹر شہباز گِل

Tanzeela qureshi

17th Oct, 2021. 07:34 pm
شہباز گِل

معاون خصوصی برائے سیاسی ابلاغ ڈاکٹر شہباز گِل نے کہا ہے کہ نااہل اپوزیشن کا پروپیگنڈہ گھٹیا سیاست کی بقاء کیلئے ہے۔

تفصیلات کے مطابق معاون خصوصی برائے سیاسی ابلاغ ڈاکٹر شہباز گِل نے مریم نواز کے بیان پر ردعمل دیتے ہوئے کہا کہ نااہل اپوزیشن کا پروپیگنڈہ گھٹیا سیاست کی بقاء کیلئے ہے، اس وقت دنیا بحرانوں کی زد میں ہے، اشیاء خوردونوش کی قیمتیں 10 سال کی بلند ترین سطح پر ہیں۔

ڈاکٹر شہباز گِل نے کہا ہے کہ عوام نے باریوں کی سیاست ختم کر کے عمران خان کو اقتدار سونپا، کرپٹ اپوزیشن کی ایک ہی فریاد ہے این آر او دو، نااہل آج احتساب اور عمران خان سے جان چھڑانے کیلئے پاؤں پڑتے نظر آتے ہیں۔

معاون خصوصی برائے سیاسی ابلاغ ڈاکٹر شہباز گِل کا کہنا تھا کہ کیلبری کوئین سیاست پر بدنما دھبا ہیں، نااہل مفرور جھوٹ، فریب اور خرید و فروخت کی سیاست کی چیمپئین رہے۔

دوسری جانب مسلم لیگ (ن) کی نائب صدر مریم نواز نے سوشل میڈیا کنونشن سے خطاب کرتے ہوئے کہا ہے کہ ہم نازک وقت میں داخل ہورہے ہیں ، ہمیں اپنی پارٹی کے لیے نہیں ملک کے لیے آگے بڑھنا ہوگا۔

انہوں نے کہا کہ ہم فیصلہ کن مرحلے میں داخل ہور ہے ہیں ، اقتدار پر کنٹرول کے لیے  ووٹ کوردی کے ٹکڑے کی طرح مسل  دیاجاتا ہے ، شائد 74  سال میں مہنگائی اتنی نہیں ہوئی ہوگی جتنی آج ہے ، جب آپ کٹھ پتلی لیکر آتے ہیں تو ملک ان حالات سے دوچار ہوتا ہے جو آج ہیں۔

مسلم لیگ ن کی نائب صدر مریم نواز نے کہا کہ نوازشریف کے دور میں  کہا جاتا تھا کہ جب پیٹرول، بجلی مہنگی ہوتی ہے تو وزیراعظم  چور ہوتا ہے ، نوازشریف تو چور نہیں نکلے ، نوازشریف کے دور میں تو غریب سے غریب بھی پیٹ بھر کے سوتا تھا ، جب ہم نے ووٹ کوعزت دو کی بات کی تو مخالفین نے ہم پر تنقید کی یہ تو اپنی بات کررہے ہیں۔

مریم نواز نے کہا کہ جب ووٹ کو عزت نہیں ملتی  تو ایسے حکمران مسلط کردیے جاتے ہیں جنکوصرف اپنی کرسی کی فکر ہوتی ہے ، فیصل آباد واپسی پر میں ایک اسٹور پر گئی تو عوام مجھے مل گئی ، عوام کا کہنا تھا کہ خدا را ہماری اس حکومت سے جان چھڑائیں، عوام کاکہنا ہے کہ ہم مرگئے ہیں اس جعلی حکومت سے جان چھڑائیں۔

انہوں نے کہا کہ مسلم لیگ ن کی سوشل میڈیا ٹیم نے اپنا بھر کردار ادا کیا ، عوام مہنگائی کے باعث رل گئی ، خود کشی کرنے پر مجبور ہوگئی ، حکمرانوں کو صرف اس بات کی پرواہ ہے کہ اپنی حکومت کو کیسے بچانا ہے۔

Square Adsence 300X250