پی ایس ایل فرنچائزز نے پی سی بی کی پیشکش قبول کرلی

زاہد فاروق ملک رپورٹر

11th Oct, 2021. 10:57 pm

پاکستان سپر لیگ (پی ایس ایل) کی فرنچائزز نے پاکستان کرکٹ بورڈ(پی سی بی) کی پیشکش قبول کر لی ہے۔

تفصیلات کے مطابق پاکستان کرکٹ بورڈ نے اعلان کیا ہے کہ پاکستان سپر لیگ کی تمام فرنچائزز نے گزشتہ ماہ گورننگ کونسل میں پیش کردہ پی سی بی کی پیشکش کو قبول کرلیا ہے۔

 پاکستان میں کرکٹ کے فروغ میں اپنا اہم کردار ادا کرنے پر پی سی بی نے چھ فرنچائزز کو مندرجہ ذیل پیشکش کی تھی۔

 ایچ بی ایل پی ایس ایل 5 اور 6 کے لیےانہیں کوویڈ 19 ریلیف دینا ۔

 ایچ بی ایل پی ایس ایل کے ساتویں ایڈیشن سے بیسویں ایڈیشن تک سینٹرل پول آف ریونیو میں ان کے شیئر میں اضافہ کرنا  اور ڈالر کا ریٹ مقرر کرنا ۔

چیئرمین پی سی بی رمیز راجہ کا کہنا ہے کہ پی سی بی اور فرنچائزز کے درمیان ان حل طلب معاملات کی وجہ سے برانڈ کی ساکھ متاثر ہورہی تھی۔

ان کا کہنا تھا کہ  خوشی ہے کہ یہ تمام معاملات بالآخر حل ہوچکے ہیں ، یہ فرنچائز مالکان کے ساتھ ہمارے تعلقات کو مضبوط بنانے کی جانب ایک بڑا قدم ہے۔

رمیز راجہ کا کہنا تھا کہ ایچ بی ایل پی ایس ایل ہم سب کے دل کے بہت قریب ہے،سال 2016 کے بعد سے ہم نے اسے آج اس مقام پر پہنچانے کے لیے بہت محنت کی ہے۔

 چیئرمین پی سی بی رمیز راجہ کا مزید کہنا تھا کہ پی سی بی کی پیشکش کو قبول کرنا اس امر کی تصدیق ہے کہ ہم ایچ بی ایل پی ایس ایل کو ایک بڑی اور بہتر لیگ بنانے کے لیے پرعزم ہیں ، ایسی لیگ جہاں بہترین کھلاڑی حصہ لیں۔

Square Adsence 300X250