وفاقی وزیر کا بجلی کے ترسیلی نظام میں بڑی سرمایہ کاری کا اعلان

وریشہ مسعودویب ایڈیٹر

22nd Oct, 2021. 05:41 pm
حماد اظہر

وفاقی وزیر برائے توانائی حماد اظہر نے بجلی کے ترسیلی نظام میں 111 ارب روپے کی بڑی سرمایہ کاری کا اعلان کردیا ہے ۔

تفصیلات کے مطابق وفاقی وزیر برائے توانائی حماد اظہر نے اپنے ایک بیان میں کہا کہ بجلی کے ترسیلی نظام میں 111 ارب روپے کی بڑی سرمایہ کاری کی جائے گی۔

 حماد اظہر کا کہنا تھا کہ سرمایہ کاری آئندہ 3 سال میں این ٹی ڈی سی کے ذریعے کی جائے گی، سرمایہ کاری کے بعد قومی گرڈ سے بجلی کی ترسیلی صلاحیت میں اضافہ ہوگا۔

وفاقی وزیر برائے توانائی حماد اظہر کا مزید کہنا تھا کہ قومی گرڈ کی بجلی ترسیلی صلاحیت 2023 میں 28 ہزار 750 میگاواٹ ہوجائے گی جبکہ قومی گرڈ کی بجلی ترسیلی صلاحیت 2024 میں 31 ہزار 500 میگاواٹ تک بڑھ جائے گی ۔

 واضح رہے اس سے قبل وزیر توانائی سندھ امتیاز شیخ نے بجلی کی قیمتوں میں اضافے پر ردعمل دیتے ہوئے کہا تھا کہ بجلی کی قیمتوں میں اضافہ مرے کو مارنے  کے مترادف ہے۔

انہوں نے کہا تھا کہ فیول ایڈجسٹمنٹ کے نام پر ہر ماہ عوام کی جیبوں پر اربوں روپے کا ڈاکہ ڈالا جاتا ہے ، پی ٹی آئی کو جس مقصد کے لیے اقتدار سونپا گیا تھا وہ اپنا کام پوری ایمانداری کے ساتھ کر رہی ہے ، اب تو عوام کی چیخیں بھی آہوں اور سسکیوں میں تبدیل ہو چکی ہیں۔

امتیاز شیخ نے کہا تھا کہ بجلی کی قیمتوں میں اضافے سے اشیائے خوردونوش سمیت تمام اشیاء کی قیمتوں میں اضافہ ہو جائے گا ، اوگرا نے پہلے ہی پیٹرولیم مصنوعات کی قیمتوں میں مجوزہ اضافے کی تجویز وزارت پیٹرولیم کو دی ہوئی ہے۔

وزیر توانائی سندھ امتیاز شیخ نے کہا تھا کہ حکومت پیٹرولیم مصنوعات کی قیمتوں میں اضافہ کرکے ایک مرتبہ پھر بجلی اور گیس کی قیمتوں میں اضافہ کر دے گی ، موجودہ حکومت نے ملک کو آئی ایم ایف کے ہاتھوں گروی رکھ دیا ہے۔

Square Adsence 300X250