معاون خصوصی برائے سیاسی ابلاغ ڈاکٹر شہباز گِل نے کہا ہے کہ معیشت ڈبونے والے معیشت پر مگرمچھ کے آنسو بہا رہے ہیں۔

تفصیلات کے مطابق معاون خصوصی برائے سیاسی ابلاغ ڈاکٹر شہباز گِل نے شاہد خاقان عباسی کے بیان پر ردعمل دیتے ہوئے کہا ہے کہ شاہد خاقان جیسے درباری بغضِ عمران خان میں مبتلا ہیں۔

انہوں نے کہا کہ آقاؤں کی کرپشن بچاؤ تحریک پر مامور نااہل درباریوں کو عوام سے کوئی غرض نہیں ، ملکی معیشت اور تشخص کو پامال کرنے والے آج ملک اور جمہوریت کا جھوٹا رونا رو رہے ہیں ، ورلڈ فوڈ پرائس انڈیکس 2011 کے بعد سب سے زیادہ ہے۔

ڈاکٹر شہباز گِل نے کہا کہ دنیا میں مہنگائی 10 سال کی بلند ترین سطح پر ہے مگر نااہل ٹولے نے احتجاج کرنا ہے ، پاکستان میں مہنگائی سب سے کم مگر نااہل ٹولے نے احتجاج کرنا ہے۔

معاون خصوصی برائے سیاسی ابلاغ ڈاکٹر شہباز گِل نے کہا کہ وزیراعظم نے ٹارگٹڈ سبسڈی کا اعلان کیا مگر نااہل ٹولے نے احتجاج کرنا ہے ، اپوزیشن کا رونا دھونا، دھرنے اور ریلیاں کرپشن بچاؤ ایجنڈے کی تکمیل کیلئے ہیں۔