پی اے ایف اکیڈمی اصغرخان میں گریجویشن تقریب کا انعقاد ہوا۔

تفصیلات کے مطابق ترجمان پاک فضائیہ کا کہنا ہے کہ پی اے ایف اکیڈمی اصغرخان میں 145 ویں جنرل ڈیوٹی پائلٹ، 91 ویں انجینئرنگ اور 101 ویں ائیر ڈیفینس کورسز کی گریجویشن تقریب کا انعقاد ہوا۔

سربراہ پاک فضائیہ ائیر چیف مارشل ظہیر احمد بابر سدھو تقریب کے مہمان خصوصی تھے۔

ترجمان پاک فضائیہ کا کہنا ہے کہ اکیڈمی آمد پر ائیر وائس مارشل قیصر جنجوعہ نے معزز مہمان کا استقبال کیا ، تقریب میں05 رائل سعودی فضائیہ کے کیڈٹس سمیت کل  125 ایوی ایشن کیڈٹس گریجویٹ ہوئے ، مہمانِ خصوصی نے گریجویٹ ہونے والے کیڈٹس میں برانچ کا نشان اور کورس میں بہترین کارکردگی پر ٹرافیاں تقسیم کیں۔

جنرل سروس ٹریننگ میں بہترین کارکردگی کی چیئرمین جوائنٹ چیفس آف اسٹاف کمیٹی ٹرافی ایوی ایشن کیڈٹ نیئر اشفاق نےحاصل کی ، ائیرڈیفنس کورس میں بہترین کارکردگی کی چیف آف دی ائیر اسٹاف ٹرافی ایوی ایشن کیڈٹ ہنزلہ معین خان نے جیتی ، ائیروناٹیکل انجینئرنگ میں بہترین کارکردگی کی چیف آف دی ائیر اسٹاف ٹرافی ایوی ایشن کیڈٹ محمد عاقب نے حاصل کی۔

کالج آف فلائنگ ٹریننگ میں بہترین کارکردگی کی چیف آف دی ائیر اسٹاف ٹرافی ایوی ایشن کیڈٹ عبدالرحمن نے حاصل کی ، ایوی ایشن کیڈٹ سفیان صدیق نے کالج آف ائیروناٹیکل انجینئرنگ میں مجموعی طور پر بہترین کارکردگی کی اعزازی شمشیر حاصل کی ، ایوی ایشن کیڈٹ انس مصطفیٰ نے کالج آف فلائنگ ٹریننگ میں مجموعی طور پر بہترین کارکردگی کی اعزازی شمشیر حاصل کی۔

سربراہ پاک فضائیہ ائیر چیف مارشل ظہیر احمد بابر سدھو نے کہا کہ مجھے افواج پاکستان پر فخر ہے کہ  وہ پیشہ ورانہ طور پر انتہائی قابل، تربیت یافتہ اور اندرونی و بیرونی چیلنجز کا سامنا کرنے کی بھرپور صلاحیت رکھتی ہیں ، پاک فضائیہ آزاد وطن کی حفاظت  کیلئے ہمہ وقت تیار ہے ، مسئلہ کشمیر کے پر امن تصفیے کے بغیر خطے میں امن ناگزیر ہے۔