میڈیکل بورڈ کی رپورٹ کے مطابق ملزم جنید اوروقاص کے ڈی این اے ڈاکٹرماہا سےحاصل نمونے سے میچ نہیں ہوئے۔

تفصیلات کے مطابق کراچی کے علاقے ڈیفنس میں خودکشی کرنے والی ڈاکٹر ماہا علی سے مرکزی ملزمان جنید خان اور سید وقاص کی مبینہ زیادتی کے الزامات میں ڈی این اے رپورٹ میں منفی قرارپائی ہے۔

پولیس سرجن حیدرآباد کی نگرانی میں جاری کردہ رپورٹ کراچی میں ایڈیشنل ڈسٹرکٹ اینڈ سیشن جج جنوبی کی عدالت میں جمع کرائی گئیں۔

ڈاکٹرماہا علی کے دوست جنید خان اور سید وقاص حسن پر متوفیہ ڈاکٹر ماہا علی کے والد سید آصف علی شاہ کی جانب سے زیادتی کے الزامات لگائے گئے تھے۔

عدالتی حکم پرمرکزی ملزم جنید خان اورسید وقاص نے خون اوربکل سویب کے نمونے جام شورو یونیورسٹی میں خود جا کرائے۔

متوفیہ ڈاکٹرماہا علی کے کپڑوں اور خون کے نمونوں سے ڈی این اے سیمپلز کا موازنہ کیا گیا۔

ڈی این اے رپورٹ کے مطابق مرکزی ملزم جنید خان اور سید وقاص حسن کا ڈی این اے متوفیہ ڈاکٹر ماہا علی سے میچ نہیں ہوا۔

رپورٹ پر ڈاکٹر وحید علی، ڈاکٹرعبدالحفیظ شیخ، ڈاکٹر وقار احمد اور ڈاکٹر رجنی کمار کے دستخط ہیں۔

استغاثہ نے ڈی این اے سیمپل نا دینے پرمقدمے میں زیادتی کی دفعات بھی شامل کی تھی۔

وکیل ملزم نے عدالت سے کہا کہ ڈی این اے سیمپل میچ نا ہونے سے مقدمے سے زیادتی کی دفعہ از خود خارج ہوجائے گی۔

عدالت نے مقدمے کی مزید سماعت 11 دسمبر تک ملتوی کردی۔

واضح رہے کہ گزشتہ برس اگست کے مہینے میں کراچی کےعلاقے گزری میں ڈاکٹر ماہا نے اپنے آپ کو گھر کے واش روم میں بند کر کے گولی مارکرخودکشی کرلی تھی۔