سید مصطفیٰ کمال نے کہا ہے کہ پیپلز پارٹی دہشت گرد بنانے کی فیکٹری ہے۔

پاک سر زمین پارٹی چیئرمین سید مصطفیٰ کمال نے اپنے ایک بیان میں کہا کہ پیپلز پارٹی کا سندھ میں پیش کردہ بلدیاتی نظام جمہوری تاریخ کا سیاہ ترین باب ہے۔

کرپٹ اور تعصب زدہ پیپلز پارٹی نے پاکستان کی معاشی شہ رگ پر شب خون مارا ہے، پی ایس پی ہر سطح پر اس کالے قانون کی بھرپور مزاحمت کرے گی۔ انہوں نے کہا کہ

پاک سر زمین پارٹی چیئرمین کا کہنا تھا کہ سندھ اور اس کا دارلخلافہ کراچی پیپلز پارٹی کی جمہوری دہشتگردی کا شکار ہے۔

 مصطفیٰ کمال نے کہا کہ پیپلز پارٹی کی متعصبانہ سوچ اور رویے سے سندھ اور اسکے دارلخلافہ کراچی میں شدید بے چینی ہے جو بدامنی میں تبدیل ہوسکتی ہے۔

پاک سر زمین پارٹی چیئرمین نے کہا کہ پیپلز پارٹی نے سندھ کو آصف علی زرداری کی زاتی جاگیر بنا دیا ہے۔عوام کا کوئی پرسان حال نہیں، عمران خان کی حکومت چلانے کی ضد نے سندھ کو بے آسرا کردیا۔

مصطفیٰ کمال کا کہنا تھا کہ ہم نے شہر سے راء کا تسلط اس لیے ختم نہیں کیا تھا کہ اسے آصف زرداری کی جاگیر بنا دیا جائے۔ بلدیاتی حکومتوں کا قانون جس بھونڈے طریقے سے منظور کروایا گیا ہے وہ جمہوری تاریخ پر ایک بدنما دھبہ ہے۔

انہوں نے کہا کہ آمدنی والے جن تمام اداروں کو کے ایم سی نے بنایا تھا ان سب کو سندھ حکومت نے اپنے قبضے میں لے لیا ہے جو کراچی کے ساتھ مسلسل زیادتیوں کی ایک کڑی ہے۔

 مصطفیٰ کمال کا کہناتھا کہ پیپلز پارٹی دہشت گرد بنانے کی فیکٹری ہے۔بدکردار حکمرانوں کی وجہ سے مایوس نوجوان دہشتگردی کے راستے پر لگتے ہیں۔

پاک سر زمین پارٹی چیئرمین سید مصطفیٰ کمال کا مزید کہنا تھا کہ پیپلز پارٹی کل کے دہشتگرد آج بنا رہی ہے ریاست اسے آج ہی روکے، ہم پیپلز پارٹی کے ظلم اور تعصب کے خلاف اب رکنے والے نہیں ہیں۔ ہم ریاست کے وفادار ہیں،حکومت کے نہیں۔